Shillong: Ynnin ka 30 tarik, ka MATTI Charitable Society kawi na ki seiñ kreh mon sñiawbha da ya krehlang ki wa ka Khasi Disabilities Association (KDA) wow e yarap ya ki 23 ngut ki bru kiwa em i duna ha i doh i pran na ki manyung wa dooh wa duk wei kiwa yoh yarap toh 12 ngut na East Khasi Hills, 3 ngut na West Jaiñtia Hills, 5 ngut na Ri-Bhoi, wa mar uwi na West Khasi Hills, East Jaiñtia Hills wa South West Khasi Hills District.
Ka MATTI ha kani ka sngi da e yarap ko da ka poisa mar T. 3000 samen, ka kymmor wa ka bai kari. Ha kani ka sngi ka MATTI da e sñiawbha ko leh man kawi ka that kup thiah ya waroh kiwa wan synran lang ya ki bru kiwa em i duna ha i da doh I pran.
Ya kani ka yalang e yarap da pynman ha KJP Girls Hr. Sec. School Shillong kawa pynlai da u President u R.L. Thabah, da duwai sdang da u K. Ryntathiang wei da yoh i klam na u Starwin Kharjana u President ka Khasi Disabilities Association wa naka G. Kharpuri MDC Nongshken kam ka kongsan.
Hawa e yei klam, u Starwin Kharjana da e khublei kyrpang u yaka MATTI Charitable Society kawa da leh ya kani ka kaambah, kawa kam ki bru kiwa em i duna ha i doh i pran ym pu em ymphoo ki wow yoh kat kani ka laad yoh yarap wei da ong u leh nalor wa duna ya i doh i pran da ban sa i dooh i duk, ki yoh yarap wyrai na ki parabru katwon i mynsien kam uwa yahkhmat kmen wa ha ka pyrthai toh i maya wa kongsan tam kawa man ka bor ka stieh kawa khroo ha i im bru wei i maya yong ki bru ya u Blai uwa i wym yoo i toh iwa pynyoo chwa ya i maya ya ki parabru kiwa i yoo da ki khmat wa emkaam sakhiat ka yarap lang, kamtæ hawa maya i, i e i wei i e mut wa i maya i.
Ka G. Kharpuri MDC Nongshken kam ka kongsan da ong ko wa ki bru kiwa em i duna ha i doh i pran toh kiwa u Blai da chna kyrpang wei kam kawa mihkhmat ka angnood ko wow kyntu wow ya krehlang neibynta wow snoh kti hawa e yarap lang.
Da pynkut ya ka yalang da i klam kyntu kynpham na u Pastor B. Syiem uwa man uwa e buit yong ka MATTI Charitable Society.
Discussion about this post