Ynnin ka 16 tarik, ka KSU Jowai Unit da yoh ko wow e yarap sñiawbha cha ki khonswet kiwa em 5 ngut chi payu kiwa chong wa sah haka chnong Lumpyrtuh, Mihmyntdu, West Jaiñtia Hills.
Hadien wa ka KSU Jowai Unit da yoh yutip ko chaphang kini, da lai yachem ko ya ki wei da chem wa uwa heh dooh na ki toh uwa dang 13 snem i rta uwa da hap wow bah ya ka lyngkor wa khia yow pynbiang neibynta ki diah yong oo wei hadien wa ka KSU Jowai Unit da lai ko cha yung yong ki, da chem ya chiboon i duna, kamtæ neiliang yong ka seiñ da lai e yarap da ki tin sap yung yow lait na u slap ka la-ær.
Ha ini i e sñiawbha da emlang u President ka Jowai Unit u Ewanmi Phawa uwa man leh u Vice President Jowai Circle wa u President ka KSU Jowai Circle u Ioanis Suchiang, u Pharaki Howni Thubru General Secretary ka Jowai Circle wa u General Secretary ka Jowai Unit u S. Paslien wa ki kattu katni ki dkhot.
U Ewanmi Phawa hei klam da pynkynmoo u ya kiwa mihkhmat wa toh u pait leh yaki khynnah wa sah khonswet, kiwa ym em wa yarap, ym toh wow pait ki du ya kiwa yoh ki wow pynemkaam wei ha i jooh i por pynrap u leh wa ha i por Election jooh pynbiej leh yaki bru yong i, wot ya kiwa ym tipmit bha ki leh ha i por Election da klam bha wei boonsien mylliñ ki mar sien dep ka Election.
