Ka Rotary Club Jowai kam kawi na ki seiñ wa yieñ u e i chakri yei miat i bha ka imlang sahlang yong ki bru wa chong chnong ha kiwa boon ki liang, ha kani ka Mulong 31 tarik Naisan da pteiñ biang ko u ekti ya ki tiar yada COVID-19 kiwa tip kam ki PPE cha ka Balang Katholik, St. Therisa Parish Jowai.
Ki dkhot ka Rotary kiwa da ya emlang ha kani ka sngi toh u Rtn. S.K. Lato, President Rotary Club Jowai, Rtn. Samehi Laloo, Secretary Rotary Club Jowai, Rtn. Mewothi Gatphoh, Sergeant at Arm wa u Rtn. B.P. Najiar.
Chwa wow e kti ya ki tiar PPE ha u Fr. Hilarius Lamare, Parish Priest Jowai neiliang u Rtn. S.K. Lato, President Rotary Club Jowai da e u ki kyntien yahkhmat hajrong ka thong yong kani ka e yarap heiwa da ong u leh wa i ekti ya kini ki tiar PPE da sdang i nadooh kini ki tayaw wadep kiwa kynthup ya ka Balang Presbyterian Jowai, Balang Thadlaboh Presbyterian, Balang Khimusniang Presbyterian, Balang Mynthong Presbyterian, Balang U Blei Jowai, Balang Unitarian Jowai, Balang Resurrection CNI Jowai, Seinraij Jowai wa kamjooh cha ka Balang Katholik, St. Therisa Parish Jowai.
Neiliang u Fr. Hilarius Lamare, Parish Priest Jowai dap u dei sñiawngooh wa khroo ya ka Rotary Club Jowai neibynta ki kaam wa bha yong ka wei kitbok kitrwiang u leh yow ye chooh chooh ko u e i chakri wa miat wa bha ya ki bru wa chong chnong kamjooh ya ka ri wa ka jaitbru.
