Ka chnong Tuber Kmai Shnong kawa man kawi ka chnong kawa em hapoh East Jaiñtia Hills District, ynne ka sngi da yoh ko yaka yarap sñiawbha da u khoo naki le ngut ki bru yong ka thaaiñ hadooh kamwa 32.50 Quintal u khoo uwa da saam cha waroh ki thlu yung kiwa em ha ka chnong Tuber.
Ki le ngut kiwa da wan wow e yarap toh u Phransis Swer na Khliehriat West, u Wanthmu Phawa na Tuber Kmai Shnong wa na u waheh chnong ka Tuber u Jiedlang Sana.
Ha chwa u sdang u saam, da yoh i kyntien pdiang burom na u waheh chnong, da yoh i kyntien sneiñ kyntien kroo na u Wanthmu Phawa, u Phransis Swer wa na u Asst. waheh chnong u Wanbha Phawa wei da yoh leh i kyntien khublei kyrpang na u Secretary chnong u Micky Lyngdoh.
Da pynlai bait pynlai ryntih katkam ka kyndon sorkar ya kani ka kaam da ki VDP ka chnong hei yahkhmat da u President u Kmenlang Dkhar wa u Secretary u Pynshngaiñ Phawa deilang wa u Bin Kamar.
Katkam wa pyntip u waheh chnong wa u Phransis Swer naki por chaki por jooh wan yarap bha u yaka chnong Tuber Kmai Shnong lada ha kiwon kiwon ki por wa emkaam leh.
Da saam ya uni u khoo cha waroh ki thlu yung kiwa em ha Tuber kawa da e kyrmen wa i myntoi kawa khroo yaki manbei manpa yong ka chnong, heijooh i por leh ki manbei da pynyoo ki yaka dak wa ki sñiawngooh ki ya kini ki bru kiwa em i mynsien u noh kyllooid mynsien cha ki ha kani ka sngi.
Discussion about this post