U MLA ka Nongkrem, u Ardent M Basaiawmoit ynne da wanrah u ya ka mat yaklam (Call Attention) hapoh ka yung dorbar hajrong i mih khubor wym em e yarap poisa ka sorkar cha kiwa yap ha ka thaw tih thlu um ha Lapalang, Shillong iwa da jia ha u Naiynñiaw uni u snem.
U Ardent da ong u wa kammon ka sorkar da yarap poisa ko cha kiwa yap ha ki krem mooyong ha iwa jia ha Mynsngat-Thangskoo wei dang ini wa dep leh da yarap poisa cha kiwa yap nei iñ i Hotel wa em ha West Bengal.
Hawa e yei jubab, neiliang u Montri Rangbah, u Conrad Sangma da ong u wa ka sorkar lai e yarap poisa hi ko cha ka yung ka sem kiwa yap tangwa boon ki wym tip wot kiwa pathai khubor neidaw wym em pynbna pyrthai wa lai e yarap.
Da pyntip u leh wa ka poisa toh kawa da e lyngba ka CM Special Grant cha kiwa ha-yung kiwa yap wei ymtoh deiwa pynemkaam da ka poisa ka State Disaster Mitigation Fund (SDMF).
Da ong u wa ka SDMF em ko ki kyndon wa rkhiñ bha cha kiwon kiwa ye u e yarap, kamtæ da pynemkaam da ka CM Special Grant wei chong ha u CM wow rai katwon wow e yarap wei ym em ka kyndon.
Chooh chooh da pynche u wa lada em iwon iwon i jia mynsoo (Accident) lada sdang wow e yarap daw man ko wa daw hap yarap ya iwi pa iwi wa jia, kamtæ da pait katkam wa emkaam.
Discussion about this post