Ka East Jaiñtia Taxi Owners Drivers Association ha i yahkhmat u President yong ka u Tiplang Rymbai wa u Secretary u Hameki Salahe chirup wa u Vice President u Edrick Paslein, ynnin da i mynsien wa sñiawkhia da yoh ki u e yarap poisa ya u Yoowanki Dkhar uwa na ka chnong Moolamanoh uwa man uwa yah kari wa em hapoh yong ka Association uwa da maad yei eh hei im yong oo heiwa ka seiñ da yarap ko da ka poisa.
Ha chwa wow e ya ini i yarap, neiliang u President u Tiplang Rymbai da booh u yei kyrkhu wa lada man i yarap iwa khian leh e wow man ki kam i kyrchaan kylliang wa pynyoo yei dak wa ka Association leh emkti lang hi ko wa kiwon kiwon kiwa yah kari kiwa chem yei eh.
Neiliang u Hameki Salahe, Secretary yong ka Association da ong u wa kam ka Association dap ko dei mynsien wa sñiawkhia hawa yoo ya kiwa yah kari wa maad ki yei eh i chitom, da ong chooh chooh u leh wa i yarap yong ka Association hanlada man ko kawa khian leh, man hi ko i kyrkhu hawa ya krehlang chirup chirup. Wei ka Association daw pyrchang chooh chooh ko wow thooh ki laad wow yarap ya ki para wa yah kari kiwa em hapoh ka Association.
U Yoowanki Dkhar uwa yah kari uwa da chem chitom, chem jynjar; hawa pdiang ya ini i e yarap da e u ya i kitbok kit rwiang ya ka Association kawa em ya i mynsien yarap kylliang, khamtam kawa da yarap oo u hapyrdi ini i eh wa da chem u katni.
Da yoh leh i klam na u Vice President u Edrick Paslein uwa da e i kyrkhu kyrdoh ya kani ka lai e yarap.
