Ka Company wa saam bordiñ wa em ha jylla Tripura kawa tip kam ka OTPC kawa pynpoi bordiñ cha ki jylla ka thaaiñ Northeast, da em ko ar tylli ki karkhana wa pynmih bordiñ kitæ ha OTPC Palatana Power Plant Unit 1 wa Unit 2 (363.3 MW X 2) heiwa ya ka Unit 1 da dep pynsangeh chwa yow pynchna, heiwa da pynduna yei poi bordiñ cha Meghalaya iwa da pynman ya ka MeECL wow pynbna ya i pyndooh bordiñ wa mar 3 kynta ha kylleiñ ka jylla iwa da sdang nadooh ynne ka sngi.
Neiliang u Montri ka chnat Bordiñ u James Sangma da pyntip u ynne ka sngi da hap pynsangeh syndet syndet ya ka 2nd Unit neidaw wa em i thut i krehkaam, iwa mut wa naka OTPC Palatana Power Plant Tripura ym em pynmih bordiñ ko iyi iyi leh kattæ.
Ini da wanrah leh yei thut i pynpoi bordiñ cha waroh ki jylla ka thaaiñ Northeast. Kamtæ ha Meghalaya da hap ko wow maad chooh sa kamwa 37 MW i duna yoh bordiñ.
Yow lait u chah ktah ki paidbah, ka MeECL da phah ko wa waroh i bordiñ wa lai cha ki karkhana, toh u lai ki cha ki paidbah wei daw yoh bordiñ ki karkhana manda poi biang i bordiñ na ka OTPC.
Da pyntip leh wa i pyndooh bordiñ wa pynbna ynnin ka sngi u pteiñ i kamwa jooh hi neidaw wa pynchna yaka Unit 1 ka OTPC.
