Ka School Managing Committee yong ka Mukhla Raij Upper Primary wa ka Higher Secondary School Mukhla dap ki da i sñiawngooh wei sñiaw burom wei e khublei chiboon ya u MLA ka 2-Jowai Constituency u Wailadmiki Shylla uwa da e yarap da ka poisa T. 2 lak na ka tulop wa chi bnai yong oo neibynta wow yoh u su ya ka tuolp wa 4 bnai yong kiwa sikai ka Mukhla Raij Upper Primary School wei kamjooh leh ya ka tulop wa 6 bnai yong kiwa sikai ka Mukhla Raij Higher Secondary School.
Ka School Managing Committee da maad ko yei eh ha uni u snem wow pynmih poisa yow su ya ka tulop kiwa sikai, kamtæ da iwi i yumut, ka SMC da chim ko ya ka rai wow lai paan yarap poisa na u MLA khnang wow yoh su ya ka tulop kiwa sikai.
Kamtæ neiliang yong u MLA da i mynsien wa sñiawkhia da e sñiawbha u da ka tulop yong oo chi bnai ha i dor T. 2 lak.
I wan ka khlam COVID-19 da pynthut ko yei ye ka SMC wow pynmih poisa kamwa da jooh leh man-u- snem yow yoh poisa u su tulop ya kiwa sikai yong kini ki skur.
Kamtæ neiliang yong ka School Managing Committee yong ka Mukhla Raij UP/Higher Secondary School Mukhla da kitbok kitrwiang ki ya u MLA yow yoh u ya i doh i pran wa chait wa khiah wei wa u Blai Tre Kynrad wow nang theh chooh chooh u ya i kyrkhu kyrdoh ya oo.
