E yaroh ka KSU Laskeiñ Circle ya u DC ka WJH, ki pulit wa u BDO wa ye u beh ya ki pulit Assam

Jowai: Ka KSU Laskeiñ Circle da yaroh ko ya u Deputy Commissioner Ka West Jaiñtia Hills wa da chimkhia u hajrong i thoh wa ka seiñ da lai booh ko ha yung krehkaam yong oo heiyatoh wa ka sorkar Assam chna Border Outpost ko ha Khatkasla.

Haka 03-06-2019 ka KSU Laskeiñ Circle da lai pait ko ya kani ka thaw kawa em kamwa 4 kilometer na Khatkasla wa ka chnat pulit yongka sorkar Assam thmu ko wow chna Outpost wow khrong poisa pyrchah yaka aiñ naki kari wa lai lyngba kani ka luti chadooh Mukoilum Assam khamtam yaki kari Meghalaya.

Kamtæ haka 04-06-2019 ka KSU Laskeiñ Circle da lai ko wow booh yei thoh ha ka yung krehkaam yong u Deputy Commissioner hajrong i leh embor ka sorkar Assam wow booh Outpost haka thaw wa dang haap hapoh u pood u ang ka Meghalaya wa pait ka chnong Khatkasla.

Ka KSU Laskeiñ Circle da yaroh ko leh ya u BDO ka Laskeiñ Block kamjooh leh ya ki chnat pulit yong ka West Jaintia Hills District kiwa da wan wow yaklam wa ki pulit ka sorkar Assam haka 12-06-2019 pyn ha ini i thaw.