Shillong: U montri rangbah ka jylla, u Conrad K Sangma ynne da wai u ya ka ki kamra skur wa thymme kani ka yungskur yong ka Mohan Massar UP School, Mawprem Shillong hei emlang u montri ka chnat i puræ puthi, u Lakhmen Rymbui, u Mohendro Rapsang, MLA, West Shillong wa u Paul Lyngdoh, EM, MDC, KHADC.
U Conrad hawa e yei klam da ong u wa man ko kawa sñiaw suk mynsien wow yoh u wai ya kani ka yung kawa da chna dei yarap poisa yonglang neibhah wa ka sorkar pynchlur ko ya ki paidbah wow kreh yonglang ki neibynta wow pynmiat pynbha ya i puræ puthi ha ka jylla.
Da ong u leh wa i eh i khoo ha ki thaw puræ toh ka um, ka bordiñ, i duna kiwa pass, ki yung wada piah da pra, wa kiwi kiwi katwa kamtæ emkaam u kreh yonglang wow pyndap pynbiang ya ini iwa emkaam waroh.
Chooh chooh da ong u wa em kamwa 25,000 ngut ki khynnah kiwa ym em pass ha ka SSLC wa HSSLC exam toh kiwa chah pynchitom kiwa chah kyntait katwa man i iwa emkaam ya ka imlang sahlang wow kreh ki chirup wow pynjanai ya i puræ puthi.
Da pyntip u leh wa ka Eklavya Model Residential Schools (EMRS) hapoh yong ka Ministry of Tribal Affairs, ka sorkar India da bhah ko 6 tylli ki EMRS ha Meghalaya iwa man iwa boon tam na ki jylla ka ri waroh kawi.
U Lakhmen Rymbui da ong u wa ka Round Table, Shillong daw man ko ka nongmuna ya kiwi ki NGO wow kreh neibynta i kaam wa bha deiwa kyntu ya ki skur wow kreh chitom ki wow pynku ya kiwa wan skur.
Kiwi kiwa da klam ha kani ka sngi toh u Area Vice Chairman, Round Table, Robin Agarwala, Chairman, Shillong Round Table, Vikram Singhania, Sq Leg Amit Singhania wa Chairperson, Ladies Circle, ka Gunjan Singhania.
Discussion about this post