Ka yung krehkaam Directorate of Mineral Resources, ka sorkar jylla ynne ka sngi chirup wa ka chnat Forests & Environment Department ka Meghalaya, ka Meghalaya State Pollution Control Board (MSPCB) wa ka Geological Survey of India da pynman ki ya ka pynsñiawthooh paidbah hajrong ka phang Responsible and Sustainable Mining ha Rev. Anthony Crockett Memorial Hall, Shangpung Mission, Shangpung, West Jaiñtia Hills.
Ha kani ka sngi ka ADC, West Jaiñtia Hills District, ka DD Syngngai da man ko kam ka kongsan.
Ya ka yalang da pynlai da u Stephan Lamo, Asst. Geologist ka DMR heiwa u FA Warjri da e u ya ki kyntien pdiang burom.
Ka DD Syngngai hawa e yei klam kam ka kongsan da ong ko wa katni da sakhi wa da kylla bha i suiñ-bneiñ wei da emkaam wow pyrkhat ya ka mynried wei lada tih ya ki mar pohkhyndaw leh emkaam wow pyrkhat wow yada ya ka rymaw.
Ya kani ka pynsñiawthooh da bhah ya ka ha ki soo bynta (Session) kiwa yatoh wa ki phang wa ki mar poh-khyndaw wei wow yada ya ka rymaw.
Ka Dr. B Mawthoh na ka Geological Survey of India da e ko yei batai deiwa ong wa i kaamram yong ka yung krehkaam yong ka toh wow pyndep ya i sorjamin (Survey) ya ki thaw wa i rukom em ki mar poh-khyndaw.
Da ong ko wa ka Krem Liatprah toh kawa jrong tam ka krem moochuni kawa em ha Shnongrim, East Jaiñtia Hills heiwa hapoh kani ka krem em chiboon kiwa sah ki jait wa im warim wajah (Fossils) wei katni ye u imja deiwa pynemkaam ya kini ki krem heiwa boon bha kiwa uiñke suwari kiwa wan pait ya ki krem ha Ri-loom Jaiñtia.
Chooh chooh ka Dr. Mawthoh da khana ko wa na u snem 1992-2020 da pynman ya ka sorjamin ha Leteiñ Valley (Litang Valley) ka East Jaiñtia Hills heiwa da chem wa hapoh i thaw wa heh 93.12 Sq Km em (Reserve) hadooh 14,885,106 Million Tonnes u moochuni.
U M. Syrti uwa man kam u District Mining Officer da klam u hajrong ka phang, Responsible and Sustainable Mining heiwa da ong u wa da em ki chnong wa khang wa ymhoi wow tih mooyong hajan chnong wei ymhoi leh wow booh ya u mooyong hajan ki hali neibhah manda slap ka um hadien wa toh ko ha u mooyong da man bih ko wei daw kai ko cha hali wei ini daw ktah i ya u kba wa ya ka hali.
Kiwi kiwa da klam ha kani ka sngi toh u DN War (ACF) Forests & Environment, wa na u MS Tiewsoh, Asst. Environment Engineer, MSPCB.
Ha kani ka sngi da wan chimbynta da ki Waheh Chnong ka Shangpung kamjooh na ki khynnah skur kiwa em hapoh ka chnong kamjooh ki khynnah ka Shangpung College.