U Montri ka chnat Social Welfare Minister, u Paul Lyngdoh da ong u wa kiwa yahkhmat ka TMC nadooh u Mukul Sangma, u George B. Lyngdoh ym em wa khang ya ki wow lai e sabut hakhmat ka Inquiry Commission wa yahkhmat da u (Rtd) Justice Mool Chand Garghad lada sñiaw ki wa em i baam tooh namo i pynemkaam bakla ya u khoo ICDS.
Yeini da ong u hadien wa ong ka TMC wa kani ka sorkar wa yahkhmat da ka NPP ka MDA-II, da sait khooid ko ya idæ heiyatoh wa u khoo ICDS neibhah tang ya ka Inquiry Report ymem pynyoo paidbah ka yow tip iyi wa da chem kani ka Committee.
U Paul da kylli u wa lada da dep puræ ki ya kani ka Report, lai hi ki mo wow e sabut hakhmat ka Commission? Lada ka Agnes Kharshiing nood ko wow lai, ileh won u Mukul Sangma, u George Lyngdoh ym em lai ki wow leh yei jooh.
Kam wow pynkynmoo wa u George Lyngdoh uwa man leh kam u State Vice President ka TMC da ong u wa kattu da dep 100 sngi i wan ka sorkar thymme tangwa ka bordiñ leh ym ye u pynbiang, i kreh leh ym yoh, ka um leh ym yoh kattu ki kaam baam tooh leh da wiar.
Ka Inquiry Report wa da e cha ka sorkar da ka Commission da ong ko wa waroh ini wa pynbaad toh iwa khlem sabut i wym em kjat wow yieñ.
Tangwa ka TMC won da ong ko wa ymtoh iwa phylla wa ka sorkar da ong ko wa ym em iyi iyi i baam tooh wei wow kyntait cha rood ya iwon iwon i chah pynbaad wa baam tooh.
Neiliang u George Lyngdoh da pynkynmoo u wa hadien wa mih khubor wa chah kem u khoo ICDS wa mih na ka FCI uwa toh u pynemkaam kam i baam ki khynnah ha kiwa boon ki ICDS Centre ha Meghalaya, u Montri Rangbah da smat u wow pynyoo hakhmat kiwa thoh khubor ya waroh ki baam kiwa da biang wa yoh hapoh ka ICDS iwa da pynkhyrngiat ya kiwa boon neibhah yeini toh u pynman da ka takit.
Kamtæ u George da ong u wa ini pynche u Montri Rangbah pynyoo ko wa da tip chwa u wa u khoo na ka Meghalaya FCI dapoi u cha ka kudam wa em ha Assam lakam wa chah kem u heipor wa em i kti u hapoh churia khoo.
