Ka MLP FT Shillong da jop ko ya ka Deinchynrum FC ynne ka sngi sdang ya ka 7th Invitation Knock Out Football Tournament ha Wahiajer wa da pynman da ka Wahiajer Sports & Cultural Club.
Ya kani ka Tournament da wan wai ya ka da u MLA ka Umroi, u Damanbait Lamare, uwa man leh u khon ka chnong Wahiajer, deiwa emlang u Kmenlang Shylla, waheh chnong warim ka Wahiajer, u Lovely Shylla, Assistant waheh chnong wahiajer, u Andrew Sari, Secretary chnong wa kiwa kitkaam ka Wahiajer Sports & Cultural Club.
Ha kani ka Tournament kiwa jop ya ka naam Champion daw yoh rah ki ya ka song poisa wa T. 2.30 lak katwa kiwa rem won T. 1.20 lak wei da em kamwa 32 tylli ki liang kiwa da wan wow chimbynta na kylleiñ ka ri Khasi, ri Jaiñtia.
Ha kani ka yalehke sdang, ka MLP da jop ko da 3-0 ya ka Deinchynrum da ki kool wa thap u Chesterfield Lyngdoh ha ka minte wa 7, u Everestarly Rynjah haka minit wa 27, u Alfortstar Sun haka minit wa 65 wei yei naam Man-of-the-Match da yoh rah da u Marbiangki Suchiang uwa yalehke ka MLP.
Ka yalehke wa bood daw pynman ha ka 17-06-2023 hapyrdi ka Lumbhahdakha SC waka Parama FC heipor 2:30 i sngi ha Wahiajer hi.
