Ka seiñ HITO da thoh cha u Lat ka jylla u C.H. Vijayashankar heiyatoh i maham u President ka seiñ Tourist Transporter Association of Assam wow khang yei psiah ki kari wa kit ya ki mar wa emkaam man-ka-sngi cha Meghalaya deiwa ong wa ini toh iwa sñiawkhia wei i wym ye u pdiang.
Da ong wa ini i rukom klam u heh kani ka seiñ ki kari kamai ka Assam da sñiaw lakam wa ka Meghalaya haap ko hapoh ka Assam neibhah ka seiñ All Khasi Meghalaya Taxi Tourist Association (AKMTTA) i yakhih ko toh du wow booh ki kyndon ya ki kari kamai kiwa lai cha ki thaw uiñke suwari donhi wei ini man ko katkam wa da leh chwa kiwa boon ki dorbar chnong ha kylleiñ ka Meghalaya.
Da kdaw leh wa ini man ko kamjooh wa da leh ha kiwi ki thaw uiñke suwari wa em ha Assam kam ha Kaziranga National Park, ka Pobitora Wildlife Sanctuary heiwa da emkaam wow chim pynemkaam da ki kari wa em ha kitu ki thaw kiwa da yoh bor wow leh yeini. Da ong leh wa kini ki thaw toh kiwa jngai na ki thaw wa man sor wei da emkaam da ki bru wa chong wa sah cha kini ki thaw wow yahluti yow bood ya ki kyndon kini ki thaw wei da em leh hadooh ki kyndon wow khang ya ki kari ki bru samen yow yada ya kini ki thaw.
Kamtæ da ong wa ini wa dawa ka AKMTTA ymtoh wow khang ya ki kari kiwa na baar ka Meghalaya neibhah wa pdiang hi ya ki wow wan pynhiar bru ki cha ki thaw sah ki wei hadien ini wow chim ki da ki kari ki tre chnong wa em ha kini ki thaw yow pynhoi khih ki.
Ka seiñ da ong ko leh wa kam ki tre chnong em ki ka hok wow kamai yow yoh myntoi ki, kamtæ da kyntu ya u Lat wow pynchitom ya kitu ki bru næ ki seiñ kiwa leh dei khwan myntoi samen wei wow pynthut yeini i thmu wow leh yei kaam wa bha ha ka khih kamai kari neibynta kiwa uiñke suwari.
Discussion about this post