Ynne ka sngi ka Voice of the People’s Party (VPP) hapoh i yahkhmat u Organising Secretary, u Damewanhi L Rymbai da lai e chithi ki cha ka JHADC neibynta u pynsñiaw yei eh i khoo kiwa kreh ka Council neibhah la 13 bnai wym em de yoh tulop ki.
Tangwa neidaw wym yoh u yachem ki wa u CEM kamjooh u Dy CEM ka JHADC neidaw wym em ki ha kamra krehkaam, kamtæ da lai yachem wei e kti noh ki yaka chithi ha u Phasmon Dkhar uwa man leh u EM ka JHADC.
U Damewanhi L Rymbai hawa klam ong u ini i dooh tulop kiwa kreh ka JHADC wym du wa ktah ko ya ki samen tangwa wot yaka yung ka sem yong ki leh kamjooh.
Khana haroh u wa yoh khubor ki ini wa dep yei em kiwa kreh ka JHADC wa khlaad hadien wa kjut neidaw wym yoh poisa ki u li thooh dawai phah sumaar.
Kamtæ hajrong ini, dawa ki la kammon kammon toh u su lut ya ka tulop wa sahteiñ kiwa kreh hapoh uni u bnai chwa ka Behdieñkhlam, lym kamtæ ka VPP daw chong pyrkhat ko yow chim da kiwi won ki laad.
Neiliang u Phasmon Dkhar won hawa klam cha kiwa thoh khubor ong u hei sakhiat kani ka bynta toh kawa ki kam ki MDC deilang wa u MLA ka Jowai da dep yaklam wei yachem ki leh ini wa dep wa u Montri Rangbah ka sorkar jylla nei bynta u pynlait noh u yaka bhah poisa.
Ong haroh u kamwa ka sorkar da kular ko u pynlait noh yaka bhah yong ka Council, yooluti ki wa hapoh uni hi u bnai daw yoh noh ki u su ya ka tulop kiwa kreh.
Discussion about this post