Shillong: Ki pulit ka jylla ynnin ka sngi wow pynembor ya ki sahep yong ka chnat hajrong i poor ki khubor thok lyngba ki Social Media deiwa pynman ya ka esikai namo ka Workshop hajrong kani ka phang ha Conference Hall u ka yung krehkaam u DGP.
Hawa yaklam wa kiwa pathai khubor, u Social Media Consultant neibynta ka Assam wa Meghalaya Police, u Salik Khan da ong u wa ha kani ka juk ymtoh de i por wow im kiwa khlan kiwa chkeh tangwa yong kiwa chalak kiwa buit.
Da pynksan u leh yei emkaam wow man ki pulit kiwa chemphang hei rukom krehkaam ka Social Media khnang wow ye ki wow leh yeiwa emkaam heiyatoh wa ki khubor thok wa poor lyngba ki Social Media deiwa pynrap leh wa i wym ye wow bood ya i stat ka juk katni daw ktah ko ha kiwa boon i liang.
Chooh chooh da ong u wa i wym em ya ka Facebook næ Twitter Account daw ktah bha ko neibhah wa lyngba kini smat poor ki khubor thok wei chimpor wow pynsakhiat ya kam kini ki khubor.
Da pyntip u leh wa ka Meghalaya Police da em Facebook, Instagram wa Twitter Account ko dang ini wot ki ar bnai wei da em palat 10,000 ngut kiwa bood (follower) ha Facebook.
Heijooh i por da pynkynmoo u leh ya i Video wa mih pyrthai biang heiyatoh wa ki manyung Punjabi ha Shillong deiwa ong u wa i em Social Media Account ki pulit ka Meghalaya da ye ko wow pynche wa ini i Video toh iwa thok.
Neiliang u Additional Director General of Police, u Heimonlang Nongpluh da ong u wa ki bor ka aiñ chem chitom ki khamtam heiyatoh wa ka stat ka juk katni wei man i iwa eh wow khoom u kdoh ya i poor ki khubor thok.
Da ong u leh wa kani ka esikai daw yarap ko chiboon ya ki pulit wow leh yeiwa emkaam hawa mih kam kini ki khubor thok deiwa kyntu ya ki pulit wa dang khian rta wow chimkhia ki ya kani ka bynta.
Discussion about this post