Ha ka Supplementary Demand u Health Minister, u Wailadmiki Shylla, ynne da ong u wa da emkaam sa Rs 2.37 klur wow su tulop ya ki 13 ngut ki Food Safety Officer wa 21 ngut kiwa kreh ka State Food Testing Laboratory heiwa da wanrah ya ka Cut Motion pyrchah yeini i paan poisa hapoh ka yung dorbar ynne ka sngi.
Hawa jubab ya ka Cut Motion wa wanrah wei yeiwa da kylli hajrong ini da ki MLA wa kynthup ya u Ardent Basaiawmoit, ka Miani D Shira, u Brightstarwell Marbaniang wa u Mohammed Mizanur Rahman Kazi, neiliang u Wailadmiki da ong u wa emkaam Rs 1.98 klur ya ka tulop ki FSO wa Rs. 39.15 lak ya kiwa kreh Laboratory.
Da ong u wa ki 13 ngut ki FSO toh kiwa da thung ha u December 9, 2025 lyngba ka MPSC hadien ka 2026-27 Budget.
Ya kini da thung ha waroh ki District wa kynthup 4 ngut ha East Khasi Hills wa 3 ngut ha West Garo Hills.
Ki 21 ngut wa kreh ha Lab, heiwa katni em du kawi ka Food Testing Laboratory ha Pasteur Hills nadooh u 1981, toh kiwa su da ka FSSAI wei da chimkti won da ka sorkar ha u January 2026 wow pyntikna wa pteiñ i leh Test.
Chooh chooh da ong u wa ka Lab da leh ko 16,682 tylli ki Test hapyrdi u April 2021 hadooh u April 2026.
U Wailad da ong u leh wa da leh ya ki 3,756 tylli ki Inspection wei da chim 2,844 tylli ki Regulatory wa 5,741 tylli ki Surveillance Sample.
Heiyatoh wa i Test ya ki dakha, da ong u wa 30 na ki 788 tylli toh kiwa em Formalin ha u 2023-24 heiwa da khang wow dai ya ki dakha hadooh 15 sngi.
Discussion about this post