Ynne ka sngi ka 30 tarik kamwa jooh leh man-u-snem, ka Kiang Nangbah Iasiat Khnam Memorial Society (KNIKMS) da kynmoo warom ko ya i dap 160 snem wa chah pasi u Kiang Nangbah deiwa pynman ya ka yalang haphrang u mot sahnaam yong uni u khlawait ka ri wa em ha Madiah Kmaiblai, Syntu Ksiar.
Ha kani ka sngi u MLA ka Jowai, u Wailadmiki Shylla da man u kam u kongsan katwa u Dolloi ka Elaka Jowai, u Puramon Kynjing da man u kam u symbood kongsan. Da booh leh ya ki syntu sahkynmoo ha u mot sahnaam u Kiang Nangbah.
U Puramon Kynjing hawa e yei klam da ong u ki kyntien wa klam u Kiang Nangbah toh klam chwar u neibhah iwa klam u man i iwa sakhiat.
Da ong u wa ki khynroo nachwa ym jooh nood ki wow klam ha ki dorbar wa em ki waheh tangwa u Kiang Nangbah dei sneiñ ka bei yong oo wow maya ya ka ri, da man u uwa chlur wow klam.
Da khana u leh ya ka parom u yong u Kiang Nangbah yeiwa chem u hadooh wa pynman ya oo wow yahkhmat wow yakhun pyrchah ya ki dohlieh.
U Wailadmiki hawa e yei klam da ong u hadooh kini ki sngi dang chah thombor ka jaitbru yong i ha kiwi ki jaitbru. Da ong u leh wa ymhoi u mylliñ i ya ka dustur yong i ha kam kini ki sngi kam ynne, lada ha ki Behdieñkhlam wa ki Chaad Sukra emkaam wow ksoh u burom i ya ka dustur yong i.
Da kyntu u wow pynneh pynsah i ya rukom man kyrpang ka jaitbru yong i.
Chooh chooh da ong u wa kam uwa mihkhmat ha yung dorbar chna aiñ da klam u ym du ya ka Jowai tangwa da klam u neibynta ka Ri-loom Jaiñtia waroh kawi.
Heijooh i por da ong u emkaam bha ki 7 MLA u kreh u yatylli ki wow kreh neibynta ka Ri-loom Jaiñtia liang wanang.
U Wailadmiki da ong u leh wa emkaam wow booh chna ya ka Museum ha kani ka thaw wow tip chooh chooh chaphang u Kiang Nangbah.
Da pyntip u leh wa ha kini ki bnai wow wan daw sdang u siang psiang noh ya ki u sarok ha Jowai wa kamjooh hadooh Yingkieñ Naar ha i lut wa T. 28 klur na ka World Bank.
Ya kani ka sngi da pynphooh da ki rwai, ki chaad wa i lehke drama wei da saam leh ya ki Prize cha kiwa jop ha ki yakob waphær waphær.
Ha kani ka sngi da pynlait leh ya ka kot chaphang u Kiang Nangbah wa da thoh da u Riquoma Rq. Laloo kawa da e pyrtuid “U Kiang Nangbah As I Know, See & Found Him To Be- A Short Conversation with Shri S. Quotient Sumer”.
