U montri rangbah ka jylla, u Conrad Sangma ynne da pyntip u wa khnang wow ye u booddien ya kiwa da phah wow chong ha yung (Home Quarantine) da ka sorkar jylla, da kyntu leh ya ki wow pynemkaam ki ya ka “Corontine App” wa da chna pynwandur (Develop) da ka IIT Bombay.
Kani ka App toh neibynta ki bru wa haap ha ki kyrdan wa kynthup ya kiwa da lai cha ka Bethany Hospital, Shillong ha namo hadien ka 24 Wisu (March) wa kiwa lai cha ka Bethany Hospital, Nongpoh ha namo hadien ka 30 Wisu (March) wei wa kani ka App toh neibynta kiwa yajan (Primary Contact or Secondary Contact) wa kiwa da pyntikna (Positive) wa yoh ki ya u COVID-19.
Da pyntip u leh wa katkam ka yukheiñ (Database) da em kamwa 5,300 ngut ki bru kiwa haap ha kini ki kyrdan kiwa em ha ka chnat Health and Family Welfare Department.
Chooh chooh da pyntip u leh wa kini ki bru daw yoh ki ya ka SMS namo ka link lyngba ka WhatsApp wow Download ya kani ka App.
Da pyntip u leh wa kani ka App daw yarap ko ya ki bru wow bood ki ya ki kyndon wow chong kset (Quarantine) wei daw pyntip ko leh lada em kiwa yoh ya uni u khñiang kamjooh leh daw yarap ko leh ya ki bor sorkar wow khang yei poor uni u khñiang deiwa pynrap leh wa ka sorkar daw pyntikna ko leh wa waroh kiwa emkaam wow chong kset u Download ki ya kani ka App.
Heijooh i por da pyntip u leh wa ka sorkar daw pyntikna ko wa kam kini ki bru na kini ki manyung kiwa Download ya kani ka App u pynpoi ko ha ki yung yong ki (Home Delivery) ya ki marbaam wei ym emkaam wow mih ki cha lait wei yeini u sdang hadien ka 22 tarik uni u bnai.
Discussion about this post