15 49.0138 8.38624 1 0 4000 1 https://wyrta.com 300 0

Emkaam u man salonsar ki chynrang wa kynthai hapoh ka imlang sahlang

0 Comments
Advertisement ad1

Jowai : Ka Women’s Welfare Organisation Seiñ Raij Jowai (WWOSRJ) kamwa jooh leh ko neipor cheipor yow kyntu ya ki kynthai ha kiwa boon ki kaam ha ka imlang sahlang, ynne ka sngi da pynman won ko da ka Seminar hei yatoh wa i kyrdan yong ki kynthai ha ka imlang sahlang “Gender Equality” wa i chah chim kabu ki ha kani ka juk Internet wa tip kam ka “Cyber Crimes”.

Ka President ka WWOSRJ ka kong W. Sumer hei klam yong ka da ong ko wa da pynman ya kani ka seminar neibhah pyn ha ki chnong ki thaw yong i, em boon kiwa chah lehbeiñ ki kynthai kam ha kti u kurim hanlada man ki kiwa chim kur na ka bei iwa pynyoo yei burom ya ka kynthai tangwa i eh i khoo wa chem ki kynthai toh iwa ha rukom.

wwosrj1

U kongsan ha kani ka sngi u B.J. Kharshandi, MCS, EAC, West Jaiñtia Hills da ong u wa lada ym booh ya ka kynthai ha ka jooh ka kyrdan wa ki chynrang itæ mut da yoobeiñ i ya chiteiñ ki bru wa em ha pyrthai. Da ong chooh chooh u wa hadooh ka UN leh da mynjur ko wa ki kynthai emkaam ki yei hok yong ki tangwa sñiawsih won u yoo wa boon ki mukotduma hei yatoh wa i chah lehbeiñ ki kynthai sah ki ha ki yung bichaar hanlada da dep booh ya ki Fast Track Court neidaw wa duna ware ki Judge hapoh India heiwa emkaam hadooh 40,000 tangwa mar chiteiñ leh ym em ki.

Ki bru wa chemphang kiwa wan e yei klam yong ki ynne ka sngi toh u Dr. Ivanteilang War u Lecturer ka DIET, Thadlaskein uwa klam hajrong ka phang “Gender Equality.”

wwosrj2

Hei klam yong oo da ong u wa lada klam yei ktien Gender mut ki chynrang leh emkaam ki yei hok yong ki tangwa ym ye u len wa ki kynthai nadooh ki por yongrim toh kiwa chah lehbeiñ nadooh i hok yong ki u lai puræ puthi, u seiñ khih hadooh wow thap vote.

Da ong u leh hanlada ha ka ri-loom Jaiñtia wa Khasi man ko ka Matrilineal Society kawa kheiñ ya i hair pateiñ i kur i jait na ka bei, ym em won man ko kawa e yei bor synchaar khadar ha ka kynthai kamtæ em hi i noh chilliang cha ki chynrang ha i pyllai kaam yung hadooh ka imlang sahlang.

Da pynkut u deiwa ong wa yow yoh ki kynthai yei hok yong ki emkaam leh ya ki chynrang wow yakrehlang ki wa ki.

Ha ka phang wa bood ka “Cyber Crime” da klam da u P. Das SI Jowai Police Station uwa ong wa ka Cyber Crime ym ktah ko du ya ki kynthai wei da ktah ko leh ya ki chynrang kamjooh kiwa chah thok poisa ha ki SMS, email hadooh ha Facebook.

wwosrj3

Ong uwa ymtoh u jubab ya ki SMS wa ong wa jop poisa phi namo ki email neibhah man ki waroh ki kaam thok. Kamjooh toh u husiar bha ya ki bru wa yaklam ha Facbook neibhah em ki bru hei pyrtuid i maya jooh ong kiwa phah Gift næ ki Present tangwa emkaam u su ya ka bai Custom wei toh u thap poisa ha ka bank account wa da dep e ki, iwa neiliang ka Custom ym jooh e ki da ki bank account.

Da ong u leh wa toh u husiar bha heipor wa pynemkaam ya ka Internet Cafe heiwa boon jooh tooh ki ya ki password yong ki account ki bru lada ym syndong bha kiwa pynemkaam.

Ha kani ka sngi da emleh ki khynnah skur, college kamjooh ki bru paidbah wa wan cha kani ka seminar.

(Content Sponsored by Women’s Welfare Organisation Seiñ Raij Jowai)

Advertisement ad1

0 Comments

Leave a Reply