Ynne ka sngi ya ka lehwarom yeiwa daw dap snem wa 75 nadooh wa laitlooid ka ri ya kawa da tip leh kam ka “Azadi Ka Amrut Mahotsav”, hapoh West Jaiñtia Hills District leh da pynman ya ka da ki bor District chirup wa ka Kiang Nangbah Iasiat Khnam Memorial Society (KNIKMS), Jowai ha Madiah Kmai Blai (Mot Sahnaam u Kiang Nangbah, Syntuksiar).
Ya ka yalang ynne ka sngi da pynlai da u Deputy Commissioner ka District, u Garod L.N.S Dykes hei emlang u Dolloi ka Elaka Jowai, u Puramon Kynjing, u Hameshaniah Suiam, u Superintendent of Police ka District u Bikram D Marak, ki dkhot na ka Synjuk ki Waheh Chnong wa kiwi kiwi.
U Puramon Kynjing hawa e yei klam da pynkynmoo u wa ka ri India da yoh ko yei laitlooid lyngba i yahkhmat u Mahatma Gandhi uwa da yah yei yakhih iwa jai-jai.
Da pynkynmoo u leh ya u khlawait ka Ri-loom Jaiñtia, u Woh Kiang Nangbah uwa da bahkhlieh wow yahkhun pyrchah ya ki pharæng hadien wa yohbor u na ki Blai ki Syiem wei da pynkut ya i mynsien u ha u tylle pasi ha ka 30 Kmaichonglad 1862 ha Iawmusiang, Jowai.
Heijooh i por da kyntu u leh ya ki bor District wa hapoh kini ki 75 tayaw yong i lehkmen ya i dap 75 wa laitlooid ka ri emkaam wow booh ya u mooyurim ha i thaw wa chah pasi u Woh Kiang Nangbah ha Iawmusiang.
U Hameshaniah Suiam uwa man uwi na ki khloor yalehke Sports wa yoh ya i naam Kiang Nangbah Awards for Sports ha uni h snem da ong u wa kam ki kynroo emkaam wow em i mynsien yaleh kam ki khlawait ka ri deiwa man leh kiwa ‘Tip Bru Tip Blai’.
Da kyntu u leh ya ki bei ki pa ki khynnah wow pynclur wow elaad e mynsien ya ki khon yong ki khnang wow ye ki u pynyoo ya i sap yong ki khnang wow man ki kiwa tyrchaaiñ wei wow paw i naam i pyrtuid yong ki.
Da pynphooh ya kani ka sngi da i rwai wa i chaad na ka Chlem Skur Tynre Shangpung.
