Shillong: Ka Hill State People’s Democratic Party (HSPDP) da pynsñiaw ko wa ka sorkar da toh wow pynbiat noh ko ya u pood u ang wa ka jylla Assam hachwa wow lehkmen yei dap 50 snem wa da yoh ya ka jylla, deiwa ka sorkar toh u chna noh ko da ka Consultative Committee ka wow bichaar bniah ya ki kot ki sla næ ki dulir wow pynsakhiat yei mantre ya ki thaw khappood.
U President ka HSPDP, u K Phlastingwell Pangniang da ong u wa ha ka Consultative Committee toh u em waroh kiwa yahkhmat yong ki seiñ saiñ pyrthai, ki Syiem, ki Dolloi, ki Sordar wa ki seiñbhalang wow bichaar bniah ya ki dulir, deiwa pynrap leh wa katkam ka Constitution yong ka ri India da klam che wa ka United Khasi Jaintia Hills District u kynthup ya ki thaw kiwa da tip kam ki Khasi States waka Khasi Jaiñtia Hills District kawa man katkam ka North Eastern Area Reorganisation Act, 1971.
Da pynsñiaw u leh ya i wym hun ya ka sorkar wa da lai wa yahkhmat da ka Congress, heiwa da lum ya ki kot ki sla wa ki dulir waroh wow lai e cha ka sorkar Assam, deiwa ong u wa man ko thij wa ya kitu ki thaw wa da ya kajia da e wow bichaar noh ha ka Assam. Da ong u wa hajrong kitai ki kot wa ka jylla em ko, emkaam leh ya ka sorkar Assam wow pynbiang ya ki kot ki sla, wei emkaam leh ya ka Committee wow emlang waroh 2 jylla hajooh wow chim bichaar ya ki kot yong waroh arliang yow pynchong nia hadooh wow pynbait.
Da pyntip u leh wa kam uwa yahkhmat ka HSPDP da jooh yaklam u wow pynbiat ya u pood u ang neibhah wa ka jylla da em ko 48 snem nadooh wa yoh yaka jylla, tangwa hadooh kattæ ym poi cha ka thong wei neiliang ka Party da e yumut ko leh cha ka sorkar ha u snem wa da dep wei kamjooh ha ini hapoh ka RDA wow pynbait noh ya u pood u ang.
Katkam i ong u Pangniang wa i bynta wa nyngkong wa ka HSPDP da pynsñiaw ko cha ka sorkar toh wow em da ka Consulatative Committee on Boder Dispute, khamtam wow pyntikna yei mantre ka jylla ya ki 12 tylli ki thawa wa kajia, neibhah ha ki 48 snem da sahkut du ha i yaklam pynbait ya u pood u ang wei ym em poi cheiwon cheiwon.
Da ong wa neiliang u Home Minister ka sorkar India, u Amit Shah da dep klam u deiwa che u wa ki jylla kiwa em yei kajia pood toh u pynbait ki para ki hi, wei na ini i daw ka Party kawa em ya ka phang krehkaam wow pynbait ya i eh ki paidbah ha khappood, ka chim ko yaka luti wei man ko i kmen lada ye wow pynbait chwa wow dap 50 snem ka jylla.
Chooh chooh uwa yahkhmat ka HSPDP da ong u wa kiwa chong chnong kiwa em ha kitu ki thaw wa em i kajia toh u em ki du kawi ka rai wow embait cha Meghalaya, tangwa da sñiawsih u deiwa ong wa em kiwa chong chnong ha kitu ki thaw kiwa baam ar maloi wei ini da booh ko hei eh wow pynbait ya u pood u ang.
