Uwa e ktien ka Meghalaya Pradesh Congress Committee uwa man leh u MLA ka Mawlai, u Process T Sawkmie da ong u wa da emkaam ya ka sorkar jylla hapoh i yahkhmat u Montri Rangbah u Conrad K Sangma wow khut pynman ya ka dorbar kyrpang neibynta wow tip wei wow yachelang pura hajrong i yaklam wa da lai hawa yatoh wa i pynbait ya u pood u ang.
Hawa klam cha ki laad pathai khubor hadien ka yalang yong ka Congress Legislature Party (CLP) kawa da pynman ha MLA Hostel ynne ka sngi, u Process da ong u wa ka kaam khappood kawa da yaklam hapyrdi ki ar tylli ki jylla kitæ ka Meghalaya wa Assam da lai chakhmat wei man ko ka phang kawa kongsan bha, neibhah kamwa yoo katni wa neiliang ka sorkar da chna ko ya ki ‘Regional Committee’ kiwa da ye wow pyndep ya ki kaam wow pyndap pynbiang leh ya ki kot ki sla neibynta wow phah won cha u Montri Rangbah.
Neiliang yong u Process da kyntu u ya ka sorkar jylla wa hadien wa neiliang yong kini ki Committee da phah ki ya ki bui (Report) wa yatoh wa i kaam khappood, da toh wow pynman noh da ka dorbar kyrpang neibhah kamwa man katni, lait na ki dkhot yong ka Committee ym em wa tip ya kitæ ki thaw yakajia pood lane iwon i thaw wa haap cha Meghalaya lane kawon wa lai cha Assam. “I emkaam i wow yoh dorbar khnang yow ye i wow tip wei wow yaklam hajrong ini, neibhah kamwa man katni, ym tip kiwon ki thaw wa em yakajia, kiwon ki thaw wa haap cha Assam wei kiwon cha Meghalaya iwa du ki dkhot Committee kiwa tip,” da ong u Process.
Da ong u leh wa kawi won ka phang wa emkaam dooh toh ka Inner Line Permit (ILP) wei neiliang ka Congress da rai wow pynbor ya ka sorkar jylla wow chimkhia hajrong ini, neibhah kamwa man katni, ini i kaam da lai suki bha.
Da ong wa ka sorkar jylla toh u pynbor hajrong kani ka phang ya ka sorkar bei, khamtam leh wa ha u snem 2022, ka Meghalaya daw lehkmen yei dap 50 snem wei katkam i yoo ha ki laad pathai khubor, u Montri Rangbahdooh ka ri, u Narendra Modi daw ya embynta lang u ha kani ka lehkmen kam u kongsan, kamtæ toh u pynbor ya u Modi wa ha ini i wan ya embynta kam u kongsan, wa toh u pynbna syndon wow pynkrehkaam noh ya ka ILP hapoh ka jylla i wow man sakhiat i myntoi wa khroo ya ki paaid chong chnong neibhah da kiwi ki aiñ ym ye ki wow e yada.
