U Montri Rangbah ka jylla, u Conrad Kongal Sangma da ong u wa emkaam wow pynbait chwa ya i eh heiyatoh wa i pyrchah ki paidbah wow chna ya ka Umngot Hydro Power Project, heiwa hap thooh ki laad kammon wow yada na i chah ktah ki paidbah lada wanrah ya kani ka Project.
Kam wow pynkynmoo heini, ki paidbah wa chong chnong na ka thaaiñ Mawkynrew Block ha East Khasi Hill wa na ka Elaka Darrang ha West Jaiñtia Hills ha ka tayaw wa dadep da mih paidbah ki wow pyrchah ya ka Public Hearing neibynta wow chna ya ka Umngot Hydro Power Project kawa 210 MW, deiwa ong wa kani daw ktah ko ya ki thaw rep wa ki thaw uiñke suwari.
Hawa klam ynne ka sngi, u Conrad ra ong u leh wa ka sorkar hap pait ko leh ha i man i long ka jylla heiyatoh wa i emkaam bordiñ khamtam wa chem chitom ko wow pynbiang ya ka bordiñ.
Da ong u wa ka sorkar da pynkhreh ko wow chna ya ki thaw pynmih bordiñ yong ka hi la ki Hyrdro, Solar næ Thermal Power yow pyndap ya i emkaam bordiñ da i thmu wow pynkhlan ya i rukom pynmih bordiñ.
Chooh chooh u Conrad da ong u wa lada em iwon iwon i eh wow pynmankaam ya ki Project, ka sorkar daw thooh laad ko wow pynbait wei wow ap leh yei sñiaw ki paidbah wei iyi wow leh, wei ka sorkar emkaam wow embyntalang wow lai ryngkat wa ki paidbah.
