Ka seiñ JSU ynne ka sngi da beiñ joor ko ya u montri rangbah ka jylla, u Conrad Sangma deiwa ong wa man u uwa arsap neibhah cha ki paidbah da ong u wa ka sorkar ym emkti ko hei wow yoh Environmental Clearance ka Star Cement tangwa ka seiñ da chem ko wa katkam ka chithi wa da thoh ha ka 22 Thohlakhmi wa da phah da ka MoEF&CC cha ka Meghalaya State Pollution Control Board (MSPCB) da ong wa u Montri Rangbah ka jylla da phah chithi u ar sien ha ka 26/07/2020 wa ha ka 10/02/2021 wow kyrpaad ya ka MoEF&CC wow pynemkaam da ka Para 7 Clause (v) Stage 3 yong ka EIA, 2006 wow pyndooh noh ya ka public hearing næ ka pynsñiaw paidbah hajrong ini i thmu ka Star Cement heiwa daw pdiang du ya ka chithi wa da soi da kiwa kyrchaan wa kiwa pyrchah ya ini i thmu wei wow phah cha ka MoEF&CC.
Ka seiñ da ong ko wa ymye ko wow pdiang ya ini i leh samen u Conrad neibhah ini pynyoo i wa ym em i tip lang næ i rai lang wa ki montri ka sorkar neibhah kamwa man da em ki montri ka sorkar jylla kiwa da pyrchah ya ini i yoh EC ka Star Cement.
Chooh chooh ka seiñ da kyntu ko ya waroh ki bru wakreh wow yada ya ka rymaw wa ki seiñ kiwa pyrchah ya ka Star Cement wow thoh cha ka NGT wa MoEF&CC wow pynyoo ya ini i pyrchah ya ka Environment Clearance (EC) neibhah wa i por dang biang i wow pyrchah wei wow pyndam ya ka EC ka Star Cement hapoh ka 30 sngi na ka tarik wa yoh ya ka EC.
Heijooh i por ka JSU da kyntu ko ya waroh ki paidbah wow pynemkaam da u khulom wei wow mih chakhmat ha kam ini i por wa chah yoohbeiñ i hok wa i sur paidbah na i leh embor ka sorkar wa ka Star Cement wow lai lait ya ki paidbah.
