Ka Dorbar Chnong Mynso-B lyngba kiwa kitkaam yong ka waroh da sap ki dei sñiawngooh wa khroo ya kiwa embynta wow yarap ya kiwa chah ktah ha i jia tyrrah kari ha Tuber Cohchrieh ha i miet ka 26 tarik heiwa da dooh noh ya ki 6 tylli ki mynsien wa kordor wei da em leh kiwa mynsoo joor kiwa katni em ki hapyrdi i chah sumaar ha Jowai wa ha Shillong.
Ka Dorbar Chnong dap ko dei sñiawngooh wa khroo ya ki paidbah ka thaaiñ Tuber kamjooh leh ya kiwa lai luti na u sarokbah NH-06 kiwa khlem artatien da tia ki chaphrang wow e yarap wei wow kit ya kiwa mynsoo cha thaw sumaar.
Da sñiawngooh ko leh ya u MLA ka Khliehriat Constituency, u Kyrmen Shylla kamjooh ya ka yung yong oo wow phah ya ka Ambulance wut-wut cha ini i thaw wa ya u MLA ka thaaiñ, u Comingone Ymbon uwa da kitkhia wow e yarap ha kiwa boon ki liang heiwa da ye u pyndep smat ya ki kaam wa boon hadooh wow pynkhooid ya i metyap kiwa da khlaad.
Da sñiawngooh leh ya ki pulit ki Doctor wa Nurse ka Khliehriat Civil Hospital kiwa da kreh chitom wow pyndep smat ya ka Postmortem wa ki Doctor ki Nurse ka Civil Hospital Ialong wa ka Woodland WK Hospital kiwa sumaar ya kitu kiwa mynsoo waroh.
Kam ka chnong, ka Mynso-B kitbok kitrwiang ko ya phi waroh wow yoh phi dei chait i khiah wei u Blai wow dang kyrkhu u ya phi ha ki kaam yong phi.
Kani toh katkam ka Wyrta na u Arnes Syntem Secretary, u Haran Dhar Chairman wa u RM Khlem Waheh Chnong ka Mynso-B.