Ka Youth Helping Hands Organisation (YHHO) ynne ka sngi da leh pynemburom ko ya ka World Environment Day deiwa pynman i thung deiñ ha i bynta ka Dorbar Chnong Caroline Colony wa hei bynta ka chnong Panaliar ha Syntu Ksiar.
Ha kani ka sngi ka YHHO da thung ko kamwa 100 tylli ki tre dieñ wa da yoh na ka chnat Forest.
Ha ka yalang wa pynlai da u President YHHO, u Kitboklang Shadap da e khublei u ya u Waheh Chnong ka Caroline Colony wa ya u Waheh Chnong ka Panaliar deilang kiwa ksoh kaam chnong waroh ar hajrong i pdiang ki wow pynman yei thung dieñ ha ka chnong yong ki.
Da e khublei ki leh ya u sahep ka chnat Forest, u B. Japang uwa da pynyoh ya ki tre dieñ.
Heijooh i por da khut leh yei ya krehlang kiwa chong chnong wow sñiawbha ya krehlang ki wa ka Youth Helping Hands Organisation neibynta ka bei rymaw kawa e yaka la’ær wow yoh u riñ mynsien man ki Second wei lada sumaar ya ka bei rymaw man i sumaar ya ka mynried yong i.
Neiliang u President ka YHHO da pynkynmoo u wa ya kani ka seiñ da sdang ki ka nadooh u snem 2018, wei deiwa yoh ko i yakrehlang na ki lok ki jor kiwa em mynsien ya ka imlang sahlang da jooh yarap kyrchaan ko ya kiwa chem chitom khamtam heiyatoh wa i e snaam heiwa da yoh ko u e yarap ya kiwa boon ki manyung heipor wa em ka khlam Covid.
Pyntip u leh wa da Register ya ka seiñ ha ka 3 tarik u April 2023, wei ka thong yong ka seiñ toh yow kreh neibynta kiwa dooh wa duk.
Da yoh leh i klam na u Waheh Chnong ka Caroline Colony uwa da e khublei yei kaam wa lai luti ka seiñ hanla hei bor wa khian. Ong u leh wa ki khynroo em ki i kitkhlieh neibynta ka imlang sahlang waka mynried.
Da pynkut yaka yalang da i duwai na u Dawanki Bthuh u wa man u Treasurer ka seiñ wa i ktien e khublei na ka Secretary, ka Idaiamon Lyngdoh.
Yei thung dieñ da pynman ki hadien wa kut ka yalang deiwa sdang chwa na ka Caroline Colony wei da lai won ki cha chnong Panaliar ha Syntu Ksiar hajan u mot u Kiang Nangbah.
Discussion about this post