Kam chibynta ka Winter Tales kawa daw pynman ha ka 14, 15 wa 16 tarik u Kmaichonglad (Dec) 2023 ha Ward’s Lake, da pynman ya ka yalang wai pyrda ya kani ka tamasa ha New Delhi hapoh ka dukan Meghalayan Age: The Store ha ka 3 tarik kam chibynta leh wow lehkmen yei dap ar snem kani ka dukan kawa dai ya ki mar wa da pynmih napoh ka jylla.
Da wan wow chimbynta da ka Dr. Mazel Ampareen Lyngdoh kawa man kam ka Montri ka chnat i rep i riang heiwa da pynyoo leh yei Video wa lai luti kani ka Winter Tales nadooh wa sdang ka ha u snem 2020.
Neiliang ka Montri da khut ko ya kiwa em ha Delhi kamjooh ha kiwi ki bynta ka ri wow wan ki cha Meghalaya yow yoh ki u sakhi ya kani ka tamasa kawa daw pynyoo rong ya ki tiar ki tar wa da chna hapoh ka jylla hi nadooh ki kchu khyndaw, ki that ki nep wa da thaiñ dei kti kamjooh i tem i put deiwa ong wa ha uni u snem ym daw ko u wan wow embynta lang.
Da pynyoo paidbah leh ya ka 2024 Calendar: Meghalayan Scapes ha kani ka sngi heiwa ha kani ka Calendar da em ki dur wa da dro da u P. Kharlukhi uwa da chimbynta bait ha ka Winter Tales.
Kani ka tamasa man ko leh kam ka rynsan ya kiwa yieñ hei yong ki hi ki kjat yow pynyoo yei sap i tap yong ki nadooh ki mar wa pynmih ki, ki jait baam wa chet ki, ki tiar thaiñ, i sur i rwai wa kiwi kiwi de ha kini ki 3 sngi.
Yow tip chaphang kani ka lympung ye wow lai ha ka website www.wintertales.in.
Discussion about this post