Ka Goa da chah jied ko wow man kam ka jylla wow pdiang ya ka 37th National Games wei yeini da pynbna da u Montri Rangbah ka jylla, u Dr. Pramod Sawant heiwa ha kani ka kynti daw em 43 tylli ki jait yalehke iwa boon dooh nadooh wa pynman ya kani ka lympung yalehke ka ri.
Ha ka kynti wa khaddooh wa pynman ya kani ka National Games ha Gujarat da em 36 tylli ki jait yalehke wei ha Kerala ha u snem 2015 da em 33 tylli iwa pynman ya kani ka National Games ha uni u snem kawa heh dooh.
U Dr. Pramod Sawant da ong u wa i thong yong oo ya ka Goa ymtoh wow man ko du kam ka thaw uiñke suwari tangwa kawa ye leh wow pynman ya ki lympung yalehke wa heh heiwa da ye leh wow pynman ya ka yakob Ironman waka World Table Tennis yow pynyoo pyrthai yeiwa ye ka jylla u pynman.
Chooh chooh da ong u wa ki thaw yalehke ka jylla toh kiwa ya ryngkat wa kiwi ha pyrthai kiwa da pynkhreh kyrpang neibynta ka National Games, kamtæ da khut u ya ki Sports Associations wa ki National Federations wow wan pynemkaam ya kini ki thaw waroh chi snem yow pynku leh ya ka Goa ha ki kaam Sports.
Ha kani ka National Games daw wan chibynta 28 tylli ki jylla wa 8 tylli ki Union Territory wei daw sdang ko nadooh ka 26 tarik uni u bnai hadooh ka 9 tarik u Khonchonglad (Nov), 2023 wei daw em ar tylli ki yalehke kiwa daw pynman ha Delhi, kitæ toh ka Cycling waka Golf.
Ki yalehke wa thymme kiwa daw pynman ha kani ka 37th National Games toh ka Beach Football, Roll Ball, Golf, Sepaktakraw, Sqay Martial Arts, Kalliyarapattu waka Pencak Silat. Kiwi ki yalehke kiwa da jooh pynman tangwa kiwa da dep chah pyndam, ha kani ka kynti u man biang ki toh ka Yachting waka Taekwondo ki wym em kynthup ha Gujarat.
Ki yalehke tynre kam ka Lagori wa Gatka da kynthup ki kam ki Demonstration Sports.
Discussion about this post