Jowai : U Berister Swer u khon ka Ribiang Swer wa u tynde u Chemphang Dhar da yoh u ya ka kyrdan wa ar ha ka result HSSLC (Science) wa pynmih ka MBOSE ynne ka sngi. Da dooh u yei kyrdan wa nyngkong du 7 marks donhi.
U Berister toh uwa lai skur ha Government Boys’ Higher Secondary School, Jowai wei da wan puræ u ha kani ka skur nadooh Class VIII. Chwa u wan u cha Jowai jooh puræ u ha chnong u ha Kyndong Tuber. Ha Jowai sah u wa ka diah ka Beipun u ka kong Missidion Swer ha Chilliangraij. Ha ka SSLC u Berister leh da yoh u ya ka kyrdan wa 15 ha ka result yong ka MBOSE.
U Berister toh u khon nyngkong na ki 6 ngut chi payu, ka bei u toh ka wa beh yaw katwa u pa u da khlad u ynnin u snem ha u Ñaichiphaw ha chwa u yaleh Selection Exam u Berister.
“I thong nadooh wa sdang toh u yoh 100 na 100 ha waroh ki subject neibhah lada ym em kam ini i thong ym ye u poi cha khmat” ong u Berister. Ong chooh chooh u leh wa toh u chalak hei rukom khrehkot yow lait u sepai i por wei oo ym duna ya ar kynta chi sngi khrehkot u hadien wa da dep skur wa tution. Ka thong yong oo toh yow lai puræ Medical (MBBS).
Ha ka subject Mathematics wa ka Physics da yoh Highest Marks u wei da yoh Distinction u ha ka Mathematics, Physics, Chemistry, Biology wa ka Khasi. Waroh ki marks u da poi ki 457.
Ki marks u man ki kamni ha wah;
English 75
Mathematics 98
Physics 95
Chemistry 97
Biology 92
Khasi 87
Ka Government Boys’ HSS ha uni u snem da phah ko 33 ngut ki khynnah yow yaleh ya ka HSSLC hewia 20 ngut da yoh 1st Division ki, 10 ngut ki 2nd Division.
Ha kawi tawan ka khubor ka Government Girls’ Higher Secondary School, Jowai ha ka kynti wa nyngkong wa yaleh HSSLC ki khynnah yong ka, na ki 11 ngut kiwa yaleh 3 ngut da yoh 1st Division, 2 ngut da yoh 2nd Division ki katwa 3 ngut fail ki.
Discussion about this post