Hadien wa da em uwi uwa da thoh (Comment) khlemakor, uwa da beiñ ya ka Seiñraij Jowai ha iwi i YouTube Video u Wytra iwa da ktah yei sñiaw ki khon ka Niamtre iwa da chem toh iwa da thoh da u Samuel Latam ha i Video wa pynyoo yei chah knieh ki mar kiwa chongdai ha Iawmusiang.
Neiliang ka Seiñraij Jowai da ujor FIR ko ha Jowai Police Station pyrchah ya uni u khynroo neibhah wa i Comment u da ktah joor ko yei sñiaw wa i dustur kiwa ngait ka Niamtre.
Uni u khynroo da phah wan hajir da ki pulit ka Jowai Police Station naka chnong yong oo na Mynthlu, East Jaiñtia Hills wei hadien i yaklam hapyrdi kiwa yahkhmat ka Seiñraij Jowai deilang wa kiwa hayung hasem yong oo ha Jowai Police Station hynne ka sngi, neiliang ka Seiñraij Jowai da maap ko ya oo wei kyntu haroh ko wym toh de u myllien u ya kam kini ki jait kaam kiwa man pyrchah yei ngait niam wada e bor da ka riti synchar yong ka ri India wa uwon uwon u bru ye u wow ngait ha kawon kawon ka niam kawa sñiaw ngait ki.
Neiliang uni u khynroo leh pdiang u yeini iwa da leh bakla u wei da kular u leh wa neini chakhmat wym myllien de u.
