Ka Nurse na ri India wa tip kam ka Nimisha Priya kawa da chah rai pasi ha ri Yemen, u pasi noh ya ka ha ka 16 tarik uni u bnai.
Ka Nimisha Priya kawa 37 snem na Kerala, da chah rai pasi ko hadien wa tynyap ko ya u bru na Yemen, u Talal Abdo Mehdi.
U Samuel Jerome Baskaran uwa man u bru wa kreh monsñiawbha wa yaklam wa ka sorkar Yemen wa kiwa ha-yung u Talal da pyntikna u yeini.
U Samuel da ong u wa da pynmih ya ka hukum wow pasi noh ya ka ha ka 16 tarik uni u bnai wei kattu chong i su ha ka sorkar India wow yarap ya ka Priya.
Ka sorkar India da jooh yaklam ko wa ki bor sorkar ka Yemen kamjooh wa kiwa ha-yung ka Priya.
Ka Priya da krehlang ko wa u Talal wow wai ya i Clinic ha u snem 2014 neibhah katkam ka aiñ hap wow ya krehlang wa u tre ri hawa sdang kreh. Tangwa u 2016 da ujor ko pyrchah ya u Talal heiwa da chah kem u wei manda lait u da pteiñ u wow pyndik ka wei knieh u leh ya ka Passport ko hadooh wym yoh de ko wow liwan.
Ha u 2017 ka Priya da e dawai ko ya u Talal khnang wow yoh ko u thooh ko ya ka Passport ko tangwa da yap noh u nei khlanbor ware ki dawai.
Hadien ini, ka Priya wa ka para wakreh ko na Yemen, ka Hanan da ah lyngkhot ki ya i metyap u Talal wei da noh ki ki ha top um.
Katkam wa man katni ka Priya kawa na Palakkad District ka jylla Kerala dang chah kset ko ha patok ha Sana iwa pait wei pynlai da ki Houthi. Ha u 2017 ka kasari ha Yemen da rai pynrem ko ya ka Priya wa tynyap ko ya u Talal.
Hadien ini ka Supreme Judicial Council da pynksan ko ya ka hukum wow pasi ya ka Priya ha u 2024 wei yeini da mynjur leh da u President ka Yemen, u Rashad Al-Alimi.
Ka Priya da lai ko cha nongbah Sana ka ri Yemen chirup wa u kurim wa ka khon ha u 2011 wow kreh kam ka Nurse tangwa u kurim wa ka khon da hap liwan ki ha u 2014 neidaw wa chem chitom poisa wei i khai ka thma ha Yemen da khanglaad i ya ki wow lai biang cha ka Priya.
Discussion about this post