Ka sorkar jylla hadien wa yachem wa ki dkhot ka Sur ka Bri u Hynñiewtrep da khana ko wa daw rah ya ka bui (Report) yong i takit hajrong i chah siat yap u Cherish Starfield Thangkhiew ha ka sngi sdang yong ka dorbar kawa daw sdang ha ka 9 tarik u Naikhynde wow wan. Ya ini da khana da u Organising Secretary kani ka kynhun, u Donboklang Kharlyngdoh hadien wa yachem wa u Symbood Montri Rangbah ka jylla.
Chwa ya ini, ki dkhot yong kani ka kynhun da toor ki cha Secretariat wow dawa pynbna paidbah ya ka Report yong ka takit hajrong i chah siat yap uwa yahkhmat warim ka HNLC hadien wa ka sorkar da kyntait ko wow yaklam ya ki hajrong katai ka Report wot hadien wa da pyrchang ki boonsien wow yachem. Hadien kani ka yakhih neiliang u Symbood Montri Rangbah, u Prestone Tynsong da phah khut u ya 10 ngut kiwa yahkhmat yow yaklam, heiwa da emlang leh u Chief Secretary ka jylla, u DP Wahlang.
U Donbok da ong u wa i wan yong ka kynhun toh wow pynkynmoo wym toh u mylliñ, wei wow ong sñiawbha sai noh ya ka Report hajrong katai ka takit da u Justice T Vaiphei, ya kawa da dep wow ekti cha ka sorkar nadooh ka 20 tarik u Naisan uni u snem.
Da khana u leh wa u Symbood Montri Rangbah da pyntip u wa ha ka 9 tarik u Naikhynde daw sdang ka dorbar wei ha katai ka sngi wa nyngkong yong ka dorbar daw wanrah ya katai ka Report hapoh yung dorbar, kamtæ ka Sur ka Bri U Hynñiewtrep daw yang ko yei por hadooh katæ ka sngi.
Da pynsñiaw u leh yei kyrmen wa ka sorkar daw puræ bniah bha ko ya katai ka Report wei wow dawa wa ya kiwa emkti ym toh u maap tangwa wow leh katkam ka aiñ, ym toh wow chah beh kreh tangwa wow pynchitom leh katkam ki kyndon yong ka aiñ.
Ha iwi won i liang, u Kharlyngdoh da khana u leh wa ka Sur ka Bri u Hynñiewtrep da pynkynmoo ko leh yei dawa wow kyrriah noh ya ka ktem CRPF kawa em ha Mawlai.
Neiliang u Marbud Dkhar da khana u wa ka kynhun da klam ko deiwa che cha ka sorkar wa neini chakhmat i pynyap bru da ki pulit ym toh de u jia i.
