U Union Minister of State ka Ministry of Development of North Eastern Region (DONER), u Dr. Sukanta Majumder ynne ka sngi da chimbynta u wow sakhi kam u kongsan ya ka lehniam Behdieñkhlam ka Seiñraij Mukhla lyngba ka Internet hadien wym ye u wow wan dei bru kawa da pynkut hapyrdi i phooh i phieñ, ki rot ki rong wa da pynhiar hapoh ka Syiem Aitnar ha deilang i chaad kmen, i kyriaw ki khon Niamtre ka Raij Mukhla chirup i sur yong ki bom ki bhuri.
Kiwi kiwa da wan hiar sakhi da ki hi ya kani ka Behdieñkhlam ha kani ka sngi kynthup ki ya u Sñiawbhalang Dhar, Symbood Montri Rangbah ka sorkar jylla kam u symbood kongsan, neitæ u Satinder Kumar Bhalla, Secretary ka NEC, u Sunil V. Deodhar, Social Worker, u Kyrmen Shylla, Montri sorkar, u Lahkmen Rymbui, Chief Adviser ka sorkar jylla, ka Santa Mary Shylla, MLA Saipung Sutnga, kiwa mihkhmat na ki Raij wa ki Elaka waphær waphær.
Ha ka yalang tbian wa pynlai da u Wailadmiki Shylla, MLA ka thaaiñ, u Dr. Sukanta Majumder da wai haroh u ya ki 6 tylli ki Scheme wa dadep pynkreh ha ki 6 tylli ki Raij lyngba i yarap poisa ka North Eastern Council kawa haap hapoh ka Ministry of DONER ha ka mang poisa wa Rs. 1,93,08,34.
Ki 6 tylli ki Scheme kynthup ki ha chnong Tuber yong ka Seiñraij Tuber deiwa chna ka thaw chong paitke heipor Behdeiñkhlam, ha ka Seiñraij Muthlong deiwa chna ya ka yung Cultural Hall, ha Seiñraij Ialong deiwa chna ya ka thaw chong paitke wa u sarok khyndaw bilat, i kynroh ha Seiñraij Kongwasan Chyrmang heiwa da chna pynheh leh ya ka thaw chong paitke heipor Behdieñkhlam, i kynroh ha Seiñraij Sohkymphor deilang i chna ya ka thaw chong paitke, kamjooh ha Seiñraij Mukhla leh deiwa chna ka thaw chong paitke heipor Behdeiñkhlam kawa da yoh ki leh wow pynemkam kattæ.
U Dr. Sukanta Majumder hawa klam da yaroh u yei man kyrpang ki jaitbru ka jylla Meghalaya, wei ong u leh hei yahkhmat u Prime Minister, u Narendra Modi da yaleh bha ki u pait kyrpang neibynta u kyntu kynrong ya ki bru ka thaaiñ North East ha ki bynta waphær waphær, wei u pynku leh yei naam i burom ka jylla Meghalaya hei kaam uiñke suwari.
Ong haroh u wa ka sorkar bei e kyrchaan ko leh yei naam i burom ka Ri-loom Jaiñtia lyngba i ye ko u pynmih ya u Chyrmit Lakadong uwa da bna naam ha ka pyrthai.
Neitæ kyrchaan ko leh ya ka jylla Meghalaya heiyatoh wow pynneh pynsah ya ka riti dustur najrong wow thooh laad u wanrah leh ki buit ki laad thymme neibynta i roi i paar.
Ha kani ka sngi pynkut ya ka lehniam Behdeiñkhlam ka Seiñraij Mukhla kawa man leh ka Behdeiñkhlam wa khaddooh man-u-snem hapoh Riloom Jaiñtia, da sakhi wa napyrdi ki 14 tylli ki rot wa da pynhiar hapoh ka Syiem Aitnar kiwa da em ki wyrta ki chula waphær waphær, u rot ka Iong-i-Community da wanrah u leh ka khubor cha ki paidbah heiyatoh i chah yooh beiñ ki khian ki dai ha ki bru wa embor, i saja wow pynkhooid yei bor pyrkhat pyrdaiñ ha u bru, da kyntu leh wow man kiwa pyrkhat chwa u klam, u man ki bru wa em i mynsien yakhun ha samen samen najrong kiwi ki jait sneiñ.
Discussion about this post