Shillong: Ha kani ka juk wa katni nadooh ki khynnah wa dang puræ ha ki Class wa dang khian waroh da ksoh mobile ki kiwa ha rukom wei da man i iwa sñiawphylla wa dang em hi kiwa kheiñkor ya i puræ puthi bar yow ksoh mobile wei kyndeh mobile.
Uni toh u Lawanaibok Kharphuli uwa da wan hei nyngkong dooh ha ka exam HSSLC (Science) 2017 u wym jooh pynemkaam mobile phone.
U Lawanaibok toh uwa chong wa sah ha Nongkseh, Shillong wei uwa puræ ha St. Anthony Higher Secondary School, Shillong wei man u leh kam uwi u Khasi wa yoh yei kyrdan nyngkong dooh neibhah ya ini i kyrdan duna ki Khasi wa yoh ki.
U Lawanaibok toh u khon u phrangsngi yong ka Pelperu Kharphuli kawa kreh ha PHE, wa u K. Basaiawmoit uwa kreh kam u UDA ha ka tnat Agriculture, Shillong.
Uni u khynroo da yoh Distinction u ha ka subject English, Maths, Physics, Khasi, Chemistry, Biology, wei da kamai u hadooh 468 mark.
Hawa yachem u wa kiwa ekhubor ynne ka sngi, u Lawanaibok da ong u wa i jop yong oo ha kani ka yakhun toh nei krehchitom, wei ym jooh pynemkaam mobile phone u wei lada kwah u yaklam wa ki lok yong oo da pynemkaam da ka mobile phone yong ka bei wa u pa yong oo.
Katkam i ong yong oo, da ong u wa ym kwah u wow pynemkaam ya ki Social Media kam ka Facebook, u WhatsApp kiwa pynlut yei por wei oo da dem bait u khop hei khrehkot kamwa ar kynta man ka sngi wei ha ki por exam da pynlut por u rap boon. Ha ki por wa lait u, sñiawsuk u wow yalehke Cricket wa ka Football.
Da pynsñiaw u leh yei sñiawngooh ya u Blai, kiwa sikai kiwa yarap ya oo khamtam ya ka bei wa u pa yong oo wei da ong u wa i thong yong oo toh wow puræ Doctor (MBBS).
Neiliang ka bei wa u pa yong oo da ong ki wa ym jooh em khang ki ya oo wow pynemkaam mobile u yow suk u ha ka lai ka wan, tangwa neiliang yong oo won ym kwah mobile u.
Discussion about this post