Jowai: Kam chibynta wow e wyrta chaphang ka Swachh Bharat, Swachh Vidyalaya ka wow man kam kawi na ki thong krehkaam wada kdaw da ka Ministry of Human Resource Development yong ka sorkar India ynne ka 14 tarik da pynman ya kawi ka prokram wa kyrpang.
Ha kani ka prokram ki 3 tylli ki skur SSA wa kynthup ya ka Dongmihsngi LPS yong ka Thadlaskein Block, ka Skenpyrsit UPS wa ka Dongwah Shkenpyrsit LPS yong ka Amlarem Blok dachim ki wow pynman ya ka prokram heiwa ki bei ki pa yong ki khynnah puræ kini ki skur dawan ki wow yachimbynta.
Ka thong wow pynman ya kani ka prokram ha kam kani ka sngi toh man ko leh kam chibynta i kynmoo warom ya ka Children’s Day kawa man kam ka dak wow pynyoo hakhmat ka pyrthai wa ki khynnah leh em ki, ka bynta wa khroo hei wow wanrah i kylla dur ya ka dong ka chnat, ka chnong ka thaw liang wanang.
Ki bynta kiwa da pynchiap hei yatoh wa ka thong yong kani ka prokram toh u man ki, wow khana wow pynsñiaw yei parom wa tbian yong u Pandit Jawarhalal Nehru, i klam i batai ki khynnah ya ki bynta ka Swachh Bharat Mission, i khana, pynsñiaw ki khynnah ya ki laad yada hei yatoh wow yoh yei khooid i jngiar wei i chait i khiah. Neitæ won chwa wow poi ka bynta wa kut da em leh i puræ ya ka Swachh Bharat Pledge heiwa da chim bynta lang da waroh nadooh ki khynnah, ki wa sikai wa ki manbei manpa.
Hadien wa dakut ka prokram yaklam napoh yung da em wan leh ka Cleaning Drive.
Neiliang ki khynnah, ki wa sikai ka Dongmihsngi SSA LPS hapyrdi hei chimbynta lang ki manbei manpa ha ka thong wow wanrah yei khooid ki thaw paidbah dachim ki wow pynman ya kani ka Cleaning Drive ha madan Kiang Nangbah Stadium deiwa chim wow lum, u pyllang, pynkhooid ya ki jhep, ki plastic kiwa da mih ha i bynta wa chakhmat yong kani ka thaw, kiwa man ka luti wa wanrah yei sihdur sihdar ka madan Kiang Nangbah Stadium.
Discussion about this post