Jowai: Ka Khasi Students’ Union (KSU) Narpuh Circle ha ka 10 tarik uni u bnai da yoh ko wow pyndep ya ka saam khusnaam (Award) cha kiwa puræ ka thaaiñ Narpuh kiwa wan ha ka kyrdan wa nyngkong ha ka Exam SSLC, HSSLC wa Graduate yong uni u snem 2018.
Ya kani ka khusnaam da saam cha ki 25 ngut ha ka yalang wa pynman ha Govt. L.P. School Sonapyrdi.
Ha kani ka sngi da emlang u Lambokstarwell Marngar President ka KSU seiñbei kam u kongsan wa u Lumlang Shadap uwa sikai ka Holy Cross Higher Secondary School Umkiang kam u symbood kongsan. Da em leh u Manly J Nongpluh, u Ohibait Dkhar, u Albinus Lamurong wa kiwi de kiwa yahkhmat ka KSU seiñbei wa ki dkhot ka KSU-JHDU wei da emlang leh u President ka Synjuk Rangbah Shnong EJHD u Satly Ryngkhlem uwa man leh u waheh chnong ka Wapung Skur wa kiwa yahkhmat chnong ka Sonapyrdi nadooh u waheh chnong wa Secretary chnong wa ki bru paidbah.
U kongsan hei klam yong oo da kyntu u ya ki khynroo khyllood wow kreh chitom ki ha ka puræ puthi khnang wa ki mynder ym yoh ki u knieh ya ka kaam ka jaam, wei ka jaitbru emkaam u man ko kawa stat. Da ong u leh wa ha ki por nachwa ki bei ki pa phah skur tangdep ya ki khon du wow tip u thoh u taar wow tip u soi pyrtuid wow thoh chithi khynroo, tangwa ha kini ki sngi i stat da psiah ki ha kawi pa kawi ka thlu yung wei ini pynyoo wa ym em de man i kiwa sahdien.
Kiwi kiwi de kiwa e yei klam ha kani ka sngi toh u Lumlang Shadap symbood kongsan, u Ohibait Dkhar President KSU JHDU, Shaphrang Pyngkhlong President KSU Narpuh Circle wa na u Dayapherbha Lamare Secretary Chnong Sonapyrdi.
Ha katai ka sngi da yoh leh wow pynman ya ka Awareness Program hajrong ka phang “Skills Development Program” wei da wan batai na ka yung krehkaam ka District Commerce & Industrial Centre da u Goldenstar Pala uwa man kam u Functioning Manager.
Chooh chooh ha katai ka sngi ka KSU Sonapyrdi Unit da lehkmen ko ya ka lyngkhooh dap 10 snem ka Unit nadooh wa da seiñ ya ka ha ka 10-11- 2008 wei da pynkup burom ya u TL Gympad uwa man u President wa nyngkong kani ka Unit uwa da kreh chitom neibynta ka seiñ wa ka imlang sahlang wei uwa da chong ngiah ha kini ki sngi. Da pynkup burom ya oo da u Manly J Nongpluh Finance & Employment Cell Secretary ka KSU Seiñbei wei da pynyoo ya ki kaam wa da leh ka Unit lyngba ki dur ki dar.
Ha kani hi ka sngi u Lambokstarwell Marngar President KSU Sengkmie da yoh u wow pynskem ya kiwa kitkam wa thymme ka KSU Narpuh Circle yong ka samoi krehkaam 2018 – 2021, wei man ki kamni hawah:
President u Kwilnis Suchiang, Vice President u Phanuel Tongper, General Secretary u Deibormi Dkhar, Asst. General Secretary u Westley Dhar, Organising Secretary u Olanbat Pdang, Asst. Organising Secretary u Watklet Lamare, Education Secretary u Sanatomba Bamon, Asst. Education Secretary u Everlasting Gympad, Publicity Secretary u Spailand Suchiang, Finance Secretary u Khihlang Shylla, Asst. Finance Secretary u Hame Gympad, Office Secretary u Koyos Pdang, Discipline Secretary u Stayling Rymbai, Environment Secretary u Westday Gympad wa u Sport Secretary u Damekit Pyngkhlong deilang wa 10 ngut ki dkhot.
Discussion about this post