Shillong: Katwa i klam ha ka sorkar Meghalaya Democratic Alliance (MDA) neibynta u kyrtong hunlang cha ka election MP dang chit i hapyrdi ki seiñ saiñpyrthai wa emlang ha ka sorkar, tangwa neiliang uwa ebuit wa khroo (Chief Adviser) ka sorkar jylla, u Dr. DD Lapang da kyntait u wow klam iwon iwon hajrong ini i kwah ki party wa synchaar lang ha ka jylla.
Hawa kattu katni ngut kiwa pathai khubor pyrchang wow kylli ya u Lapang hajrong ini i kwah kyrtong monlang ka sorkar MDA, neiliang yong oo da ong u wa ym em bynta i iwon iwon leh ha ka election MP ha u snem wow wan.
Hawa kylli won yei daw wym bien u wow klam hajrong ini, u Lapang da ong u wa oo ym em man u u bru yong kawon kawon ka party.
Kam wow kdaw heini wa ha kini ki tayaw wa dadep i yaklam ha ka sorkar MDA neibynta u kyrtong monlang da chit bha i, heiwa kiwa yahkhmat ya ki seiñ saiñ pyrthai wa em ha ka sorkar da pynsñiaw ki jaar jiar i kwah wei wow bichaar won ha ka Co-ordination Committee ka MDA.
Ki seiñ kiwa em ha ka sorkar synrop MDA kynthup ki ya ki MLA na ka NPP, UDP, HSPDP, PDF, BJP wa ki MLA samen, wei hadooh katni dang du ka UDP kawa da pynbna ya u kyrtong wow bichaar da ka Co-ordination Committee katwa kiwi won da pynsñiaw ki yei angnood wow sai jar u kyrtong wow tyrwa ha ka MDA kam u kyrtong hunnlang.
Discussion about this post