Ka lympung yalehbol wa tip kam ka 1st Saba Knock-Out Tournament 2021 da poi noh ko cha wakut ha ka 23 tarik uni u bnai ha madanbol ka Saba.
Kani ka lympung toh kawa da pynman da ka Dorbar Chnong Saba chirup wa ki pulit ka West Jaiñtia Hills hajrong ka thong wow chna pynmiat ya ka Saba LP School wei wow wanrah ya i yajan wa ki paidbah ka thaaiñ khappood ka jylla Meghalaya wa Assam.
Ha kani ka Final u Syrpai Dkhar da man u kam u kongsan katwa u MDC ka thaaiñ, u Aibor Shadap da man u kam u symbood kongsan hei emlang u IC ka Saba BOP, u SI John K. Majaw, u waheh chnong ka Saba, u Andreas Suchiang wa kiwi kiwi.
Chwa wow sdang ka yalehke da em ka yalang heiwa u Waheh Chnong ka Saba da e u ya ki kyntien pdiang burom.
Neiliang u Syrpai Dkhar hawa e yei klam da yaroh u ya ka Dorbar Chnong Saba wa da pynman ko ya kani ka lympung chirup wa ki pulit heiwa da ong u wa i stat i tip toh i tiar yaleh wa khlanbor tam wow pynwiar ya i dooh, i sahdien wa i chait i khiah.
Da e khublei u leh ya ki pulit kiwa da kreh chirup wa ka Dorbar Chnong wa da ye ki wow pynjop yeiwa angnood ki waheh wasian ka chnong wei da ong u leh wa katkam wa yoo u, ki pulit ha kani ka thaw man ki kiwa yajan bha wa ki paidbah wei man leh iwa yoosuk wa krehlang ki wa ki bor ka chnong.
U Aibor Shadap da dap u dei sñiawkmen wow embynta ha kani ka sngi, da e khublei u leh ya ka Dorbar Chnong Saba wa da ye ko wow chna pynmiat ya kani ka skur ka chnong deiwa kitbok leh ya ka wow lai ko chaphrang ha ki kaam yong ka.
Ha ka yakhun Final da man ko hapyrdi ka Suchiang FC wa ka Six Star FC wei ya kiwa jop ha kani ka lympung da jied da ka yachut Tie Breaker heiwa ka Six Star FC da jop ko da 7-6. Heipor chiteiñ yong ka yalehke da wai leh ya ka yung wa da chna pynmiat yong ka Saba LP School.
Neiliang u Waheh Chnong ka Saba da e khublei kyrpang u leh ya u MLA ka thaaiñ, u Nujor Sungoh, wa da yarap u wow chna pyndep ya kani ka yung skur heiwa da ye leh wow wai ya ka ha kani ka sngi. Chooh chooh da e khublei kyrpang u leh ya u DC kamjooh leh ya u SP wa da krehlang ki wa ka Dorbar Chnong wei khamtam ya u In-charge ka Saba Border Camp wa da yarap wow pynman ya kani ka lympung.
