U Chief Minister ka jylla, u Conrad K Sangma ynne da wai u ya ka skurbah wa nyngkong wow mantre wei wow pynlai da ka sorkar jylla kawa tip kam ka “Captain Williamson Sangma State University” deiwa emlang u Speaker, u Thomas A. Sangma, u Deputy Chief Minister, u Snaiwbhalang Dhar, u Education Minister, u Rakkam Sangma wa u Power Minister, u Abu Taher Mondal.
Ya ka yung krehkaam kani ka skurbah da wai ha u January 2023 deiwa sdang u kreh ha u June 2018, hei lut wa ₹ 16.96 klur.
Ya kani ka University da e pyrtuid ha u Chief Minister wa nyngkong ka jylla, u Captain Williamson A Sangma.
Yeini waroh da pyrkhat wow leh ha u snem 2011 heiwa nyngkong da sdang ya ka kam ka Captain Williamson Sangma State Technical University yow tipmit ya ki Technical College wa em hapoh ka jylla tangwa ha u 2022 da pynkylla ya ka kam ka Captain Williamson Sangma State University yow tipmit ko ya ki Technical wa Non-Technical College.
U Conrad hawa e yei klam da ong u wa kani toh ka sngi wow sahkynmoo najrong wow yarap ko u pynku ya ka puræ puthi kamjooh i thooh bniah (Research) wa harukom yow pynkylla dur ya ka jylla waroh kawi khamtam hei puræ puthi.
Da ong u leh wa da lai palat 50 snem tangwa ka jylla yong i ym em ko da ka yong ka hi ka University wei ini man ko kam i kular wei kreh ka sorkar yow pynbha pynmiat yei puræ puthi.
Da pynbna u leh wa daw booh ya ka Shillong Campus kani ka University neibynta kiwa na Khasi wa Jaiñtia Hills.
“Kani ka University u krehkaam noh ko wei kattu ki College wa em hapoh ka jylla ye ki wow yoh yei tipmit na kani ka skurbah ka jylla wei daw lait leh ki khynnah wow yaleh ya ka Common University Entrance Test (CUET) neibynta ka Under-Graduation wa Post-Graduation tangwa kitu ki College wa tipmit da ka NEHU da hap hi ki wow yaleh ya ka CUET,” da ong u Conrad deiwa kyntu ya ki College wow chim kabu yeini.
Ka Vice Chancellor kani ka Captain Williamson Sangma State University toh ka Prof. Vasanthi Vijayakumar kawa da ong wa kani ka skurbah daw wanrah ko yei puræ puthi wa pliah wei wow pynchlur leh yei leh Research.
Ha kani ka sngi wai da em leh kiwa boon ki College kiwa da wan e ya ki Application yow toh yei tipmit na kani ka State University wei kitæ toh ka Williamnagar College, Williamnagar, Captain Williamson Sangma College, Baghmara, Rongjeng Model College, Rongjeng, Ampati Degree College, Ampati, PA Sangma Abong Noga College, Tura, Mason Philips Academy, Tura, Mirriam Rural Women’s College waka Tura Christian College.
Kam wow pynkynmoo wa ka University Grants Commission da tipmit ko ya kani ka Captain Williamson Sangma State University katkam ka kyndon Section 2(f) ka UGC Act 1956 ha ka chithi wa da pynmih ha ka 06-12-24.
Discussion about this post