Ki bor pait bor pynlai ka West Jaintia Hills Karate Do Association, Jowai hadien i pykhai im biang ya ka yalehke Karate hapoh ka District, ha ka 12 wa ka 13 tarik uni bnai da pynman ki ya ka West Jaintia Karate Do Championship 2025 ha Yungwalieh ka Loompyrdi Iongpiah.
Neiliang ka Directorate of Sports & Youth Affairs, Meghalaya Shillong leh da embyntalang ko hei wow pynman ya kani ka yakob kawa lai bait lai ryntih.
Ha ka yalang yahkhmat yong i wai pynemburom ya kani ka yakob da emlang leh u R.L. Bimee Suwer, Waheh Chnong Loompyrdi Iongpiah kam u kongsan najrong u Alan Niangti, President WJHKA, u Manbha Kynjin, General Secretary WJHKA, u Pynioo Phira, Chief Instructor, u Ribeit O Pde, Organising Secretary wa kiwi kiwa chah khut sñiawbha.
U Alan Niangti hei klam kam u chongknor da kynmoo u yei naam i pyrtuid yong u Stephan Leong waman uwi na kiwa seiñ wa sdang ya ka yalehke Karate hapoh ka ri-loom Jaiñtia kamjooh ha ka jylla Meghalaya ha ki por ki snem kiwa da lai.
U R.L. Bimee Suwer hei klam kam u kongsan e u i yaroh wa khroo ya ki manbei manpa kiwa da pynchlur ya ki khon ki kti yong ki wow ya embynta ha kani ka jait yalehke heiwa da sneiñ da kroo wei e mynsien u ya kiwa chimbynta waroh nadooh ki khynnah hadooh ki khynroo khyllood wow man kiwa tip u ksoh u kune yei burom i akor.
Ong u leh i pynman ya kani ka yakob toh chibynta ka thong yong ka seiñ wow yohlaad kiwa ya chimbynta u ya pynyoo pyntaw sap, pyntaw buit, pyntawbor wei kam kiwa chimbynta leh yow tip u sñiawthooh phi yeiwon yeiwon i duna yong phi iwa man leh ka luti yow tip phi u pynjanai yei duna i bakla ha ki por kiwa chakhmat.
Ha kani ka sngi da em leh i saam ya ki Medal cha ki khynnah kiwa dajop ha ki kyrdan yakob waphær kiwa da mang kyrpang katkam i rta yong ki kiwa kynthup ya ka ‘Kumite’ wa ka ‘Kata’ heiwa ya ka bynta wow e kti ya ki Medal da emlang leh u R.L.Bimee Suwer ki dkhot ka WJHKA, Jowai wa kiwi kiwa chah khut sñiawbha.
Discussion about this post