“Pteiñ u pyntngit ya ka pyllong, ha kawi ka sngi daw hap thiah pyn hajrong i jhep” toh ki kyntien u Seatle uwa naam u nong America (Native American) ki Duwamish. Ya ka nongbah Seattle ka ri United State of America da yoh pyrtuid ko na uni u Seattle Ken wei ya kini ki kyntien da thoh u ha kawi na ka chithi cha u President wa 14 ka ri America, u Franklin Pierce ha u snem 1855.
Ynnin ka sngi wa kyrpang ki khynnah, ka Nongtalang College Eco Club hapoh ka Department of Environment Studies yong ka College da pynman ko ya ka ‘Awareness Campaign on Waste Management’ ha ka College ha Nongtalang. Ya kani ka yalang da pynlai da u First Born Myrchiang uwa man u Lecturer yong kani ka College, heiwa u Dr H.H. Mohrmen da man u kam u bru chemphang ryngkat ki dkhot ka Society for Urban and Rural Empowerment, Jowai.
I pynsñiawthooh nyngkong toh hajrong ka Solid Waste Management Rule 2016 heiwa da hikai kammon wow pynyakhlad yei jep ya iwa py’ut na iwa ye wow pynmyntoi ya ki bru. Da ong u wa waroh toh kiwa pynmih jhep wei toh i kaamram wow kitkhlieh waroh heiwa kammon wow leh ya i jhep wa pynmih i.
Hawa pynkut ya kani ka e sikai, u Dr. Mohrmen da pynkynmoo u ya ki kyntien kiwa uni u bru da klam u palat 167 snem nachwa neibah i eh i khor yang i ya ka pateiñ khamtam neidaw wa da sdang chit ka pyrthai wei da kylla i man i long ka suiñ toh nei jhep wa pynmih ki bru ha kylleiñ ka pyrthai wei lada ymye wow leh iwon iwon hajrong ini daw chah tlep i ha i jhep.
Kiwi wa da klam ha kani ka sngi toh u Kmen Myrchiang, Secretary ka Governing Body yong ka College wa i rwai na ka Fabulour Rymbui wa ki lok yong ka katwa ka S. Suting da e ko ya ki kyntien khublei. Kiwa wan chimbynta na ka SURE kynthup ki ya ka Ilasiewdor Gashnga wa ka Potisni Khonglah.
