Ka Jaiñtia National Council (JNC) da pynsñiaw ko yei wym sñiawsuk wa i pyrchah wa joor heiyatoh wa ka tulop ki le tylli ki Autonomous District Council, ka wow su noh da ka sorkar jylla kamwa da pynbna u Chief Minister, u Conrad Sangma.
Hajrong ini ka seiñ da paan pynche ko wa ha kawon ha ka Paragraph ka Sixth Schedule e bor ko ya ka sorkar wow su tulop ha kiwa kreh ka ADC neibhah ym em u thoh kamtæ.
Ka seiñ da kylli ko iyi wow jia yei bor wa laitlooid ki ADC wei lada kamni daw pyntlot i ya ki ADC deiwa pynrap yeiyi u jubab kiwa kreh ya ka sorkar jylla namo ki ADC. Da kylli ko leh hawa kamtæ i thung kreh u leh da ka sorkar namo deiyi wei lada ka sorkar wow su ya ka tulop ki MDC leh.
Ka seiñ da kylli ko leh lada kani ka tulop daw ah na ka bhah (Share) ki ADC kam na kiwa yoh na ki mar pohkhyndaw, na ki bai kari wa ki mar na khloo wei yi wow khrong ya ka Professional Tax lada u chim da ka sorkar namo da ki ADC?
Chooh chooh ka seiñ da kylli ko wa heiwon wa ka sorkar jylla u yoh poisa ko wow pyndap ya ka tulop yong waroh le tylli ki ADC?
Hajrong ini ka seiñ da e buit ko leh wa khnang wow dap u biang ki ADC toh u pynkhlan ya i rukom yoh poisa yong ki hi khnang wym jia de kamni neini chaphrang.
Ka seiñ da ong ko wa ki ADC ymtoh de u thung kreh ki palat yeiwa ye ki u su weiwa ka sorkar toh u e yukheiñ ko katwon yoh dan wei katwon ka bhah ki jar jiar ki ADC ha i por wa biang.
Discussion about this post