Hadien wa mih i awri wa i yakhih hajrong i wymye ka Jowai Municipal Board wow kit ya i jhep na Iawmusiang wa na ki yung ki bru iwa da poi chadooh u pood wow khang yei lai i wan ki bru na ki chnong ka thaaiñ Mynkjai, ynne ka sngi da soi noh ya ka soskular hapyrdi ka JHADC, JMB, ki 7 chnong, ka Synjuk Waheh Chnong War Jaiñtia wa ka KSU.
Ya kani ka soskular da soi ha yung krehkaam u Deputy Commissioner ka West Jaiñtia Hills ynne ka sngi hei emlang u Deputy Commissioner ka District u Garod LSN Dykes wa u MLA ka Jowai, u Wailadmiki Shylla.
Ha kani ka soskular da tynyap noh ya ka soskular wa da soi hapyrdi ka JHADC wa ka JMB ya kawa da soi ha ka 1 tarik Naisaphra 2017 heiwa u pynemkaam ya ka Mynkjai kam ka thaw noh-jhep neibynta 20 snem.
Kawi na ki kyndon ka soskular da ong ko wa ya i thaw noh-jhep (Landfill) ha Mynkjai wa em hapoh u pood ka Mupyut u pynemkaam chipor wei wa ka dorbar chnong Mupyut daw ye ko wow tih moo wa chyiap na ini i thaw kamwa da jooh leh waroh chi kattu weiwa wa kiwon kiwon ki kreh ki chna ha ini i thaw toh u yaklam wa ka Dorbar Chnong Mupyut.
Ya u Chowkidar toh u thung da ki tre chnong, lada noh-roi ya i jhep kani ka soskular u yap ko wot hachwa wow kut i por, ki kari kit jhep toh u tymmoh bha yow lait i jhep wow haap heipor wa kit.
Da rai leh wow khang ya i sait kari ha Wah Mynkjai, hawa kut ini i por ka JMB toh u pynkhooid ko ya i jhep katkam ki kyndon ka NGT.
