Shillong: U Montri Rangbah ka jylla, u Conrad K Sangma da pyntip u wa hadien wa da yoh yaka yutip wa u Doctor Rangbah ka Bethany Hospital da chah ktah u ha u khñiang COVID-19, ka sorkar da chim ko yaki laad wow yada deiwa phah khang sbak ya waroh ar tylli ki thaw sumaar yong ka Bethany, kawi ha Shillong wa kawi ha Nongpoh.
Ka sorkar jylla ynne ka sngi da chong yalang jhan ko yong ka kynhun montri wow bichaar ya ki luti wow lai hadien wa da chem wa em u khñiang COVID-19 ha nongbah Shillong.
Hawa klam wa ki laad pathai khubor hadien ka yalang, u montri rangbah da pyntip u wa ka sorkar mar ya yoh yutip ya ini da phah ko ya ka Corona Task Force wow booddien ya ki bru kiwa da yachem wa u Doctor nadooh ka 22 tarik u Wisu (March) wei kamjooh ya kiwi kiwa da yachem pateiñ.
Da pyntip u wa ha kini ki 18 kynta, da em kamwa 2000 ngut ki bru kiwa da pyntip cha ka sorkar wa da dep lai cha Bethany Hospital, wei da dep Test leh ya 90 ngut ki bru wei ini i leh Test daw pteiñ man ka sngi, heiwa daw paan yarap leh naka sorkar Assam yow ye u pyndep u Test ya boon ngut ki bru khnang wow yada nei poor uni u khñiang ha ka jylla.
Hawa kylli yei long i man i chait i khiah u Doctor na Bethany, u Montri Rangbah da pyntip u wa katkam i yutip wa yoh u, i sumaar man ko ha ka Category C.
Discussion about this post