Hadien wa mih ka khubor wa daw sangeh ka Jowai Municipal Board (JMB) wow wan thooh jhep na yung ki bru ha Jowai kamjooh leh na ki yaw ki haat, ynne ka sngi da em ka yalang hapyrdi u Chairman ka JMB wa ki sahep ka JMB, u DC ka West Jaiñtia Hills u Garod LNS Dykes deiwa emlang u ADC ka District uwa man leh h CEO ka JMB, u PK Boro.
I daw wa sangeh wow lai thooh jhep ha Jowai toh wa pyrchah ki 7 tylli ki chnong deilang wa ka KSU ya ka JMB wow noh jhep ha ka thaw wa katni wa em ha Mynkjai. Ini da mih i neidaw wa em i thmu ka JMB wow chna ya u sarok (Approach Road) wow lai cha ini i thaw noh jhep heiwa da pyrchah ya ini i thmu deiwa pyrchah leh yei pteiñ wow pynemkaam ya ini i thaw kam i thaw noh jhep.
Kam wow pynkynmoo wa ini i thaw wa noh jhep katni da pynemkaam nadooh wa sdang u 2016 hadien wa iwa rim da dap i wei da mih boon i ujor wow rah noh cha iwi i thaw. I thaw wa pynemkaam katni toh iwa em pyn cha kylla ka wah Mynkjai iwa em pyn hajan i thaw warim.
Ha kini ki sngi, ya ini i thaw wa katni leh da mih i pyrchah wow pynemkaam ki neidaw wa da joor wa sma, kamjooh wa hap roi i jhep charood sarok heiwa neiliang ka KSU Moopyut Unit ini wa dep da maham ko wow khang ya ini i thaw noh jhep.
Ynne hawa yaklam wa u DC da pyntip u wa ka JMB ym em ko i thaw wow noh ya i jhep iwa dei yong ka hi, wei ki thaw wa dang jied wow noh ya i jhep em ki ar tylli wei ya kitæ da booh ya ka Task Force kawa daw chong pyrkhat hajrong ini ha ka 23 tarik uni u bnai wa lada hoi næ ym hoi wow pynemkaam ya kini ki thaw wa thymme.
Da pyntip u leh wa na ka yalang ynne ka sngi da rai wa ha kini ki sngi wow wan u Chairman wa ki sahep ka JMB daw yachem ki wa kini ki 7 tylli ki Dorbar Chnong khnang wow pynche ya ki yeini waroh wei kyrmen skem u wa daw ye ki u pynbait noh yeini wei daw chah biang chipor (Temporary) wow noh ya i jhep ha Mynkjai.
Neiliang u DC da ong u leh wa yooluti u wa ha ki 3-4 sngi wow wan daw ye biang wow pynbait ya ini i kaam yow ye u wan thooh jhep biang ka JMB ha chnong Jowai.
