Ki ar ngut ki bru kiwa wan da kawi ka thuk-thuk heiwa da siat ki leh kamwa 3 kuli cha i yung wa sah u Salman Khan wa em ha Bandra Mumbai ynne i step, da chah pynngat ki hapoh ki kyndon aiñ wa thmu ki u pynyap bru kamjooh ka aiñ rah tiar yasiat (Arms Act).
Ha ini wa jia ym em wa mynsoo tangwa da em uwi u kuli wa da psiah chapoh yung wei em leh uwa toh cha chram, wei dei kreh smat ki pulit da tip leh ya kini ki bru wei da yoh leh wow kem yaka thuk-thuk da ki pulit ka Mumbai tangwa ym pu em yoh u kem ya kini ki bru.
Ini i thaw sah u Salman Khan toh iwa tip kam i Galaxy Apartments wa em ha Bandra wei ini da jia i heipor kamwa 5:00 step heiwa kini ki bru kiwa wan da kawi ka thuk-thuk wei uwa chong hadien da siat u 3 kuli dep te yut wot ki neini i thaw.
Heipor wa jia ini, u Salman Khan em u ha yung yong oo tangwa ym em wa mynsoo.
Neiliang u Montri Rangbah ka Maharashtra, u Eknath Shinde da yaklam u wa u Salman Khan lyngba ka Phone wei da kular u wow pynchitom ya kini kiwa emkti wei ki pulit u yaleh ki wow chem smat yow kem ki.
Kini ki bru kiwa da leh yeini da chah pynngat ki hapoh ka kyndon ka Section 307 ka Indian Penal Code wa Section 3(25) ka Arms Act.
Ki pulit da pyntip ki leh wa ka Pistol wa pynemkaam toh ka 7.62 wei kini kiwa da leh yeini i kaam da suba toh kiwa na baar ka Maharashtra.
Discussion about this post