Kiwa yahkhmat ka Khasi Students’ Union (KSU) kiwa da chah kem ha ki pulit wa kynthup ya u President, u Raymond Kharjana, u Vice President, u Pynkmenlang Sanmiet wa u General Secretary, u Reuben Najiar da chah pynngat ki ha kiwa boon ki kyndon aiñ wa kynthup nadooh ki kyndon dat wei pynmynsoo bru wa ha ki kyndon thmu pynyap bru najrong ki kyndon wa pynsih ya ki mar ki mata paidbah.
U Superintendent of Police ka East Khasi Hills, u Vivek Syiem da khana u wa da rah ya kini ki le ngut cha ka yung Kasari ynne i step heiwa da yoh bor wow kset ki 14 sngi da ka Judicial Custody. Da pyntip u wa kitai kiwa yahkhmat ka KSU da pynngat ki ha ki kyndon aiñ waphær waphær ka BNS wa ka PDPP Act, kiwa yatoh wa i pynlum paidbah pyrchah aiñ, i dat bru, i thmu pynyap bru hadooh wa da mynsoo ki bru paidbah.
U SP da pyntip u wa ki pulit da pynlum pynlang ki yow kheiñ hadooh katwon kiwa chah tympra wa kiwa mynsoo heiwa da chem wa em boon ngut kiwa mynsoo wa wa kynthup ya ki pulit kiwa da chah dat.
Hawa yatoh wa i e bor wow pynman Rally, da pyntip u wa ki bor District wa ki pulit da e bor ki deilang wa ki kyndon wei deiwa em leh i chaniah ha kiwa yahkhmat ka KSU. Da pyntip u wa da booh leh ki ya ki pulit yow pait ya ki kattu katni ki thaw, tangwa iwa da jia toh ha ki thaw wym em ki pulit, deiwa pynrap wa neini chakhmat lada ki seiñ næ kiwon kiwon ki wym bood kyndon daw chem chitom ki wow yoh bor neibynta u mih paidbah.
Discussion about this post