Ka District Hub for Empowerment of Women (DHEW), West Jaiñtia Hills kawa haap hapoh ka yung krehkaam ka District Social Welfare Officer, WJH, kam chibynta ka thong namo ka Campaign wa chiphaw sngi yong ka International Day of the Girl Child, Beti Bachao Beti Padhao, ha ka 10 tarik uni u bnai, neiliang ka St. Dominic Higher Secondary School, Mowkyndeng, West Jaiñtia Hills District, da pynman ko i pynsñiawthooh paidbah hajrong i hok yong ki khynnah kynthai wa kynthup nadooh ki baam wa tei, i hok wow yoh yada wa kamjooh ki laad e sumaar.
Ka Y. Kyndait, Gender Specialist, DHEW hawa klam yahkhmat da pynsñiaw ko ya ki Scheme waphær waphær hapoh ka Mission Shakti yong ka District Hub neibynta u pynkupbor ya ki kynthai. Da khana haroh ko ya ki laad yarap kam ka One Stop Centre, Beti Bachao Beti Padhao (BBBP), Women Helpline (181), Pradhan Mantri Matru Vandana Yojana (PMMVY) wa ka Palna National Crèche Scheme.
Neitæ da batai ko ya ka International Day of the Girl Child Day hajrong ka phang yong uni u snem kawa ong “Girls’ Vision for Future”. Da klam haroh ko hajrong i emkaam u kyrchaan ya ki khynnah kynthai la hei puræ puthi, i chait i khiah wow e mynsien ya ki haki yalehke Sports, ki kaam saiñhima sima, wow e yada ya ki wa ki bynta waphær waphær.
Ka M. Niang, Lady Supervisor, ICDS Laskein Block da kyntu ko ya ki khynnah wow baam da ki jait baam wa tei kam kiwa da e yumut da ka ICDS cha ki Anganwadi Centre, neibhah man kiwa ye u yoh boon ki Nutrients wa Vitamins, khnang yow lait nei chitom wa boon jait deiwa yoh yei doh i pran wa chait wa khiah.
Ka S. Lakiang, kam ka Ambassador yong ka Beti Bachao Beti Padhao, DHEW WJH, da e mynsien ko ya ki khynnah lyngba i lai luti wei chem yong ka heiyatoh wa i kaam lehke Sports. Da khana ko heiyatoh wa i jop ko ha ka lympung WFF India 2023, Mr & Ms East India 2023 Zonal Body Building & Fitness Champion kawa da man ha Ranchi Jharkhand wei ha ka Mr and Mrs India 11th National Body Building & Fitness Champion 2023 kawa da man ha R.B. Dangayach Auditorium, Jaipur Rajasthan.
Wei ong leh ko wa i embynta ha ka Sports wym mut du wow pynkhlan yei bor i doh i pran, tangwa wot yei bor pyrkhat kamjooh. Heijooh i por i tip wow pynyait yei por wei kreh chitom toh kawa emkaam yow jop hei im.
Ka M. Nongtdu da klam ko hajrong i chah ktah ki khynnah ha ka District, wei klam leh hajrong ka POCSO Act, ka Juvenile Justice Act. Wei pynrap leh yei emkaam u hikai ya ki khynnah ya i rukom tba wa bha wei iwa sih wa khlem akor. Neitæ khana ko ki laad yarap neibynta ki khynnah kynthai lyngba ka Child Helpline 1098.
Ka E. Niang, Health Educator na Laskein CHC da pynche ko hajrong i emkaam u pait bniah yei chait i khiah ki khynnah wa kynthup ka Blood Pressure, Anaemia wa ka Cholesterol, khnang yow lait u yoh yei chitom wa boon jait hadien habood. Wei da pyntip ko wa em leh ka Adolescence Friendly Clinic ha Laskein CHC heiwa ki kynthai wa khai khynroo yoh ki u lai li mih neibynta u yoh yarap heiyatoh wa i eh i khor wa maad ki.
Ha kani ka sngi da em leh ka Open Quiz Competition, wei da e khusnaam leh cha kiwa jop.
Ya ka yalang da pynlai da ka S. Meliora Lamare, Gender Specialist, DHEW wei yei kyntien pdiang burom da yoh naka Sr. M. Nongseij yong ka St. Dominic Higher Secondary School, Mowkyndeng.
Discussion about this post