U Symbood Montri Rangbah ka jylla uwa pait leh ya ka chnat Pynroi Sor, u Sniawbhalang Dhar da pyntip u wa ka sorkar da pynkhreh ko wow pynkrehkaam noh ya ki thaw noh jhep kiwa man katkam i stat ka juk wa katni ha waroh ki thaw wa man sor hapoh Meghalaya.
Heiyatoh wa i kyrriah ya ka Marten, da ong u wa da sahteiñ hadien wa kawi kawa chong chnong na Nonghali da yaleh ko da ka mukotduma ko ha High Court hajrong i thmu wow kyrriah noh ya ka Marten cha katai ka chnong.
U Sniawbhalang da ong u wa i pynkhreh wow wanrah da ka Scientific Landfill ha kylleiñ ka jylla toh neidaw wa ka NGT ym chah de ko wow noh roi kat chawa yoh ka thaw.
Da pyntip wa neibynta ka Nongpoh neiliang ka sorkar da pynlait poisa ko kamwa Rs. 5.8 klur wei i kreh da man ko kawa lai chakhmat yow chna ya kani ka thaw noh jhep.
I thmu ka sorkar toh wow booh ya kini ki thaw noh jhep ha waroh ki District Headquarter kam ha Tura, Williamnagar, Nongstoiñ, Jowai wa Khliehriat.
Hawa yatoh wa ka thaw noh jhep ha Jowai, u Sniawbhalang da ong u wa ka chnat dadep jied ko kamwa 3-4 tylli ki thaw wei daw rai kawa kammon kawa rap biang. Da pyntip u leh wa i pynbait pynbiang da jan dep lut, wei daw paan bor na kiwa yahkhmat chnong wei daw lai leh lyngba ka State Pollution Control Board yow pynman ya ka Public Hearing.
Heiyatoh wow pynkhooid yei kylla loom i jhep ha Marten, u Symbood Montri Rangbah da khana u wa ki jhep warim ha Marten da jan lut i heiwa da ye wow sai kamwa 2.5 lak Ton i jakhlia.
Discussion about this post